Ali audit orqanlarının (AAO) korrupsiyaya qarşı mübarizədə əsas funksiyalarından biri ictimai institutların gücləndirilməsidir.
“EDnews” xəbər verir ki, bu barədə “Report”a açıqlamasında Hesablama Palatasının Dövlət gəlirlərinin və iqtisadi sahələrin auditi şöbəsinin müdiri Azim Abasov bildirib.
Onun sözlərinə görə, AAO dövlət orqanı kimi öz səlahiyyətləri çərçivəsində milli dürüstlük sisteminin - yəni şəffaflıq, dürüstlük və hesabatlılıq prinsiplərinə əsaslanan idarəetmənin - dayaq sütunlarından biridir:
“Korrupsiyanın aşkar edilməsindən daha təsirli yanaşma onun qarşısının alınmasıdır. Bu baxımdan, ali audit orqanlarının fəaliyyəti çoxşaxəlidir. Onlar korrupsiya və sui-istifadə hallarını audit planlamasına daxil etməli, nəticələri ictimaiyyətə vaxtında və açıq şəkildə təqdim etməli, maarifləndirməni gücləndirməli və korrupsiyaya qarşı alətləri təkmilləşdirməlidirlər. Eyni zamanda, pozuntularla bağlı məlumat verənlər üçün təhlükəsiz mexanizmlər yaradılmalı və aidiyyəti qurumlarla sıx əməkdaşlıq təmin olunmalıdır”.
A.Abasov qeyd edib ki, bəzi ölkələrdə, o cümlədən Azərbaycanda AAO-lar hüquq-mühafizə orqanlarının səlahiyyətlərinə malik deyil: "Lakin audit zamanı korrupsiyaya dair əsaslı şübhələr müəyyənləşdikdə, bu hallar müvafiq istintaq orqanlarına ötürülür. Zərurət olduqda AAO əməkdaşları məhkəmə istintaqında şahid qismində çıxış edə bilirlər".
Ekspertin fikrincə, bu orqanların korrupsiya və digər pozuntuların aşkarlanmasında effektivliyi onların fəaliyyət strategiyası ilə birbaşa bağlıdır:
“Metodologiyalar daim yenilənməli, əməkdaşların peşəkarlığı və ixtisas səviyyəsi artırılmalıdır. Uğur yalnız texniki prosedurlar deyil, həm də insan resurslarının bilik və bacarıqları ilə ölçülür”.
A.Abasov, həmçinin qeyd edib ki, AAO əməkdaşlarının şəxsi dürüstlüyü və etik prinsiplərə sadiqliyi təmin edilməlidir. Onun sözlərinə görə, bunun üçün mütəmadi treninqlər, maraqlar toqquşmasının qarşısını alan tədbirlər və etik öhdəliklərin yazılı təsdiqi vacibdir. Eyni zamanda, pozuntular barədə məlumat verən şəxslər üçün təhlükəsiz və anonim mexanizmlər - o cümlədən qaynar xətlər və onlayn sistemlər - yaradılmalıdır, Hesablama Palatasının rəsmisi vurğulayıb.
