Bu gün Rusiya kinematoqrafiyasında erməni əsilli kinematoqrafların olması Azərbaycan əleyhinə çəkilən filmlərin meydana gələməsinə səbəb olur. Dəfələrlə bu ölkədə yaşayan erməni kinematoqraflar müxtəlif vasitələrlə ölkəmizin ərazi bütövlüyünü şübhə altına almaq məqsədilə təxribatyönümlü işlər görüblər.

Hazırda da onlar bu istiqamətdə fəaliyyətlərini davam etdirirlər. Azərbaycanın ayrılmaz tərkib hissəsi olan Dağlıq Qarabağ və ətraf rayonlar haqqında təxribatçılığa xidmət edən filmlər çəkən ermənilər bu saxtakarlıqlarını həyata keçirmək üçün xarici kino şirkətlərindən istifadə edirlər. Şübhəsiz, onların əsas məqsədi Dağlıq Qarabağ münaqişəsinin gerçək mahiyyətini təhrif etmək, erməni xalqını “əzilən, zərərçəkən xalq” kimi təqdim etməkdir. Bununla yanaşı, işğal altında olan Azərbaycan ərazilərini də “tarixi erməni torpağı” olaraq qəbul etdirməkdir.

İndiyə qədər xaricdəki erməni lobbisinin təşəbbüsü ilə bir sıra xarici kino şirkətləri qanunsuz olaraq Dağlıq Qarabağ haqqında filmlər çəkiblər. Növbəti filmin isə Rusiya kinematoqrafçıları tərəfindən istehsalata buraxılmaq ərəfəsində olduğu bildirilir. Söhbət bu ölkədə çəkilməsi planlaşdırılan Qarabağla bağlı təxribat xarakterli filmdən gedir.

Mətbuatın yazdığına görə, Rusiyanın “Veqa film” kino şirkətində Dağlıq Qarabağla bağlı təbliğat xarakterli film çəkilir. “Veqa film” kino şirkəti tərəfindən Xankəndi şəhərindən olan erməni rejissor Robert Defin rəhbərliyilə “Walter” adlı film çəkiləcəyi haqqında Rusiya KİV-də xəbər yer alıb. Baş rolda fransalı aktyor Bibi Nasirinin çəkiləcəyi ekran əsərində hadisələr 90-cı illərdə Dağlıq Qarabağ münaqişəsilə əlaqəli şəkildə baş verir. Hazırda bu filmin Rusiya Mədəniyyət Nazirliyinə təsdiqlənmək üçün təqdim olunduğu bildirilir.  

Qeyd edək ki, Rusiyanın Moskva vilayəti azərbaycanlılarının regional milli-mədəni muxtariyyəti ölkənin mədəniyyət naziri Vladimir Medinskiyə müraciət edərək filmin çəkilişlərinin qadağan edilməsi tələbini irəli sürüb. Azərbaycanlıların regional milli-mədəni muxtariyyətindən nazirliyə ünvanlanan məktubda azərbaycanlı diaspor təmsilçiləri tanınmış aktyorları cəlb etmək yolu ilə bu filmin geniş ekranlara çıxarılmasının hədəfləndiyini, bunun da Dağlıq Qarabağ münaqişəsilə bağlı aparılan danışıqlara mənfi təsiri ola biləcəyi, bu məsələnin, bütövlükdə, qardaş Rusiya ilə Azərbaycan xalqları arasında ədavət toxumları səpmək məqsədi daşıdığı vurğulanır.

Şamil Əliyev: “Bunun arxasında Rusiya kino sənayesinin ciddi fiqurları, maddi imkanlar və siyasi məqsədlər dayanır”

Eurasia Diary xəbər verir ki, tanınmış kinorejissor Şamil Əliyev “Bakı-Xəbər”ə bildirib ki, Rusiyanın kino şirkətinin Dağlıq Qarabağ münaqişəsi haqqında film çəkməsi yolverilməzdir. O hesab edir ki, Rusiyanın dövlət büdcəsi hesabına çəkiləcəyi deyilən filmin çəkilişlərinin baş tutmaması üçün Azərbaycan tərəfi tədbirlər görməlidir. Ş.Əliyev qeyd etdi ki, əvvəlcə Rusiya kino şirkətinin ermənilərlə birləşib belə bir film çəkib-çəkməməsi məsələsi araşdırılmalı və buna adekvat cavab verməlidir. “Ermənilərin Azərbaycan əleyhinə filmlər çəkməsi, bu yolla təxribatçılıqla məşğul olması yeni deyil. “Veqa film” kino şirkətində Dağlıq Qarabağla bağlı təbliğat xarakterli film çəkilirsə, artıq buna ciddi reaksiya verilməlidir. Bu kimi məsələlərə bir-iki rejissor, kino mütəxəssisi səviyyəsində cavab verilməsi elə effekt verməyəcək. Dağlıq Qarabağ münaqişəsi ilə bağlı çəkilən filmə görə Azərbaycan Respublikasının Mədəniyyət Nazirliyi və Xarici İşlər Nazirliyi Rusiyanın müvafiq qurumlarına müraciət ünvanlamalı və buna rəsmi etirazlarını bildirməlidirlər. Əminəm ki, hər iki nazirlik bu addımı atacaq və belə təxribatçı bir filmin çəkilməsinin qarşısını almağa nail olacaq. Bilirsiniz ki, belə bir film çəkilirsə, burada ancaq güclü maliyyə dəstəyindən söhbət getmir, həm də görünür ki, bu filmin çəkilməsi üçün ortada siyasi razılıq var. Yəni bu filmin çəkilməsində siyasi razılıq amili istisna deyil. Bu səbəbdən də Azərbaycanın aidiyyəti qurumları bu filmlə bağlı tədbir görməlidirlər. Film çəkmək elə asan məsələ deyil, burada pul amili ilə yanaşı, siyasi dəstək də əsasdır. Görünür, o filmi çəkmək istəyən kino şirkətinə ciddi maliyyə dəstəyilə yanaşı, siyasi dəstək verənlər də var. Arxasında ciddi siyasi güc dayanan bir filmi çəkmək istəyənlərə də ciddi cavab verilməlidir. Çünki bunun arxasında Rusiya kino sənayesinin ciddi fiqurları, maddi imkanlar və siyasi məqsədlər dayanır”.

Ş.Əliyevin bildirdiyinə görə, heç bir vaxt Xankəndinin kino sənayesi olmayib, indi də yoxdur. O hesab edir ki, Dağlıq Qarabağ münaqişəsinin əsl mahiyyətini təhrif etmək istəyən ermənilər layiqli cavablarını almalıdırlar. Kinorejissorun sözlərinə görə, Azərbaycanın torpaqları işğal olunub və öz doğma yurdlarından azərbaycanlılar didərgin düşüblər, münaqişədən ən çox zərər çəkən də ermənilər yox, bizik.

• Tag:
• Şamil Əliyev
• Qarabağ
• film
• Ermənistan
• erməni separatizmi