Ermənistan Müdafiə Nazirliyinin dəstəyi ilə Qarabağ müharibəsindən bəhs edən “Mənim xaçım” filmi yaxın günlərdə ekrana çıxarılacaq. Qarabağ həqiqətlərinin erməni maraqları baxımından gündəmə gətirildiyi bu film düşmənin incəsənət müstəvisində də öz təxribatçılıq fəaliyyətini davam etdirdiyini göstərir.

Eurasia Diary xəbər verir ki, Moderator.az-a açıqlama verən hərbi ekspert Şair Ramaldanov Azərbaycanın da Qarabağ həqiqətlərini incəsənətin köməyilə gündəmə gətirilməsinin, bu sahədə aktivliyini artırmasının vacibliyinə diqqət çəkdi:

“Filmlər müəyyən ideologiyaların, ideyaların yeridilməsi ilə bağlıdır. Filmin imkanlarından istifadə edib böyük bir kütləni qoyulan məqsədə yönəltmək olar. Filmin kütlə üzərində təsiri çox böyükdür. Biz uşaq vaxtından müəyyən filmlərlə böyümüşük. II Dünya Müharibəsi ilə bağlı elə filmlərə baxmışıq ki, böyüyəndən sonra bu və ya digər döyüşlərin həmin filmlərdə göstərildiyi kimi olmadığını anlamışıq. Lakin bütün hallarda biz bu filmlərlə böyümüşük, onların təsiri altında olmuşuq.

Ermənilər bu cür filmlər vasitəsi ilə gələcək nəsilləri inandırmağa çalışır ki, onların işi guya haqq işi olub. Guya bu torpaqlar ermənilərə məxsus olub və bu torpaqları almaq onların tarixi missiyası olub. Onlar insanları öz yalanlarına inandırmaq üçün kitablardan, filmlərdən istifadə etməyə ehtiyac hiss edirlər. Yəni bunlar düşünülmüş addımlardır. Onlar bu yolla öz işğalçılıq siyasətlərinə haqq qazandırmağa çalışırlar.

Düşünürəm ki, Azərbaycan bu yöndə daha aktiv olmalıdır. Bir ara bununla bağlı filmlər çəkildi. Aprel döyüşləri ilə bağlı filmlər çəkildi. Bu cür filmlər bundan sonra da çəkiləcək.

Lakin son günlər yeni filmlər haqqında heç bir xəbər eitmirik. Düşünürəm ki, əgər erməniləri Qarabağ müharibəsi haqqında bir film çəkirsə, Azərbaycan üç film çəkməlidir. Öz həqiqətlərini bu filmlər vasitəsi ilə gənc nəsillərə, eləcədə dünya ictimaiyyətinə çatdırmalıdır. Çünki bu gün incəsənət müstəvisində də bir müharibə gedir. Qarabağ həqiqətlərinin dünya ictimaiyyəti arasında daha geniş təbliği baxımından həmin filmlərin rus, ingilis dillərində də beynəlxalq arenaya çıxarılması məqsədəuyğun olardı”.

Qeyd edək ki, “Mənim xaçım” adlı filmin çəkilişinə 2014-cü ildən başlanıb. Filmin çəkilişində Ermənistanla yanaşı, əcnəbi şirkətlər də iştirak edib. Filmin rejissoru Şavarş Vardanyan qeyd edib ki, filmdə arxiv materiallarından da istifadə olunacaq. O, Qarabağ müharibəsində jurnalist kimi iştirak etdiyini, 1200 saatlıq arxiv materialına malik olduğunu qeyd edib.

Filmdə olayların necə, hansı rakursdan təqdim ediləcəyi hələ bəlli olmasa da, Ermənistanın Müdafiə Nazirliyi tərəfindən maliyyələşdirilən filmdə Qarabağ müharibəsinin səbəblərinin təhrif ediləcəyi, erməni vəhşiliklərindən, işğal faktından heç bir söhbət açılmayacağı bəllidir. Şübhəsiz ki, erməni rejissorlarının çəkdiyi digər filmlər kimi bu film də Azərbaycana qarşı incəsənət və təbliğati müstəbidə gerçəkləşdirilən böhtan kampaniyasının növbəti halqasını təşkil edəcək.