Bu günlərdə xoş bir xəbərə sevindik. Azərbaycan Respublikası Prezidenti cənab İlham Əliyev incəsənət xadimlərinə Azərbaycan Respublikasının Prezidentinin mükafatlarının verilməsi ilə bağlı sərəncam imzalayıb. Adlar sırasında layiqli, istedadlı insanlarımızı görmək fərəh hissi doğurur. Belə bir çətin dövrdə İncəsənət adamlarımıza göstərdiyi diqqətə görə Cənab Prezidentə minnətdaram. 

 

Dostumuz, Beynəlxalq Avrasiya Mətbuat Fondunun (BAMF) Mədəniyyət Elçisi Qoçaq Əsgərovu siyahıda görmək isə bizi xüsusi sevindirdi. Azərbaycanın əməkdar artisti fəxri adına layiq görüləndə də beləcə sevinmişdik. Hələ 2007-ci ildə Londonun məşhur "Brunei Gallery" teatrının səhnəsində çıxışı ilə beynəlxalq arenada debüt edən Qoçaq, öz zəhməti, istedadı ilə sonralar BBC Radio 3  "World Routes" adlı proqramında, WOMADelaide (Avstriya), WOMEX  (Yunanıstan), SXSW (ABŞ), Musica dei Popoli (İtaliya) və s. məşhur festivallarda, konsertlərdə çıxışlar edir, populyarlaşmağa başlayır. Bir müddət sonra BBC, Əl-Cəzirə kimi dünyaca məşhur televiziyalar, mətbu orqanları ondan xüsusi reportajlar hazırlayır. Ötən il BAMF-ın dəstəyi ilə Əl Cəzirə TV-nin 5 hissədən ibarət və ərəb dünyasında xeyli marağa səbəb olan «Azərbaycan — Əbədi Odlar Diyarı»  sənədli filmində Qoçağın ifası xüsusi diqqətə səbəb olmuşdur. 

 

Qoçaq Azərbaycan muğamının təbliğində, inkişafında öz səsi və yaradıcılığı ilə xüsusi istedada malik musiqiçidir. Qoçağın musiqidə muğamın heç bir təsirə məruz qalmadan sintez şəklində qərb dinləyicilərinə çatdırılmasında böyük xidmətləri vardır. Onun muğamın ilahi üslubuna xas şəkildə həzin və axıcı səsi, musiqi dünyamıza bir ərməğandır. 

 

O, həm də qazidir, Qarabağ qazisi, dünənin döyüşçüsü, bu gün öz musiqisi üzərindən vətənimiz və dövlətimizə xidmət göstərən peşəkar musiqiçi. Onun səsindəki yanğı, nisgil işğal altında olan yurdlarımızın fəryad səsidir. Bir sözlə Qoçaq bir dünyadır, Qoçaq  elinin, yurdunun, həsrətini daşıyan, vətənimizin qoçaq oğludur. Bu çətin və şərəfli yolda ona fəth edilməmiş zirvələr arzu edirəm. Bağrıma basıram, Beynəlxalq Avrasiya Mətbuat Fondu və kollektivimiz adından təbrik edirəm.

 

Beynəlxalq Avrasiya Mətbuat Fondunun prezidenti Umud Mirzəyev

 

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary