Azərbaycanın öz torpaqlarını böyük şücaət göstərərk işğaldan azad edilməsi sadəcə yerli deyil, xarici musiqiçilər üçün də ilham mənbəyi olub. Məşhur amerikan müğənni Della Mayls Azərbaycanın bu zəfərinə mahnı və klip hədiyyə edib.

Eurasia Diary xəbər verir ki, Della Mayls mahnısında Qarabağın ermənilər tərəfindən işğalı və törətdikləri vəhşilikləri musiqi dilində ifadə edib. “Many years ago”(İllər öncə) adlanan mahnının müəllifi türkiyəli yazıçı Turqay Evrendir.

Mahnı Azərbaycan xalqının Qarabağın işğalı ilə barışmaması və işğalla böyüyən uşaqların öz torpaqlarını azad etməsi təsvir edilib.

Klipdə ermənilərin Qarabağda törətdiyi qətliamlardan şəkillər və Azərbaycan xalqının çəkdiyi zülmlər əks olunub. Bunun ardınca müzəffər Azərbaycan Ordusunun keçirdiyi uğurlu əməliyyat və Bakı şəhərində keçirilən möhtəşəm Zəfər paradından görüntülər təqdim olunub.

Azərbaycan və Türkiyənin birliyini təcəssüm etdirən bir sıra hadisələr də kilpdə öz əksini tapıb. Azərbaycanda keçirilən paradda Türkiyə Prezidenti Rəcəb Tayyib Ərdoğan və Azərbaycanın Ali Baş Komandanı İlham Əliyevin yan-yana dayandığı səmimi anlar və Türkiyə Ordusunun nümayəndələrinin iştirakı klipdə  göstərilib.

Klipin sonunda dövlət başçısı İlham Əliyevin azad edilmiş torpaqlara ziyarətindən qürurverici görüntülər təqdim edilib. Cıdır düzü və azad Şuşa şəhərindən verilən görüntülər həssas notlarla klipi sonlandırıb.

Qeyd edək ki, Della Mayls pop musiqisinin əfsanəsi Maykl Ceksonun və məşhur müğənni Uitni Hyustonun bek-vokalçısı olub.

Musiqiçi ABŞ-da Hyuston şəhərində dünyaya göz açıb. Gənc yaşlarında musiqiyə olan həvəsi onu müğənni olmağa sövq edib. Los-Ancelesdə fəaliyyətə başlayan Mayls bir çox musiqi şirkətlərinin diqqətini cəzb edib.

Pop kralı Mayk Cekson ilə bir səhnəni bölüşən Mayls musiqi dünyasının aparıcı şəxslərindən birinə çevrilib. O, həm də məşhur müğənni Uitni Hyustonun da bek-vokalçısı olub.

2018-ci ildə İslam dinini qəbul edən musiqiçi Türkiyəyə köçərək, orada yaşamağa qərar verib. O, burada Türkiyənin Prezidenti Rəcəb Tayyib Ərdoğan ilə görüşərək həyatdakı ən böyük arzularından birini həyata keçirib. Müğənni bu barədə öz Twitter səhfəsində paylaşım edərək sevincini bölüşüb.

Della Mayls öz musiqi hədiyyəsi ilə Azərbaycan həqiqətlərinin dünyaya çatdırılmasında əhəmiyyətli xidmət göstərib. Onun tezliklə ölkəmizə səfəri edəcəyi gözlənilir.

Qeyd edək ki, Della Mayls Azərbaycanın Əməkdar artisti, Beynəlxalq Avrasiya Mətbuat Fondunun musiqi elçisi Qoçaq Əsgərovla yaxından dostluq edir. Eyni zamanda sıx əməkdaşlıq edən Mayls və Əsgərov yeni musiqi üzərində çalışırlar.