Plenar iclasda çıxış edən İran İslam Respublikasının Azərbaycandakı səfirliyinin Mədəniyyət Mərkəzinin sədri Ali Pourmarjan Nizami Gəncəvi irsini hikmət, əxlaq, mənəviyyat xəzinəsi adlandıraraq, sözlərindəki təravət və yeniliyin heç zaman sönməyəcəyini vurğuladı. Misir Ain Şəms Universitetinin professoru Şirinxanım Abdelnaem Hasanin atası Dr. Əbd əl-Nəim Həsəneynin 1951-ci ildə yazdığı “Nizami Gəncəvi: dövrü, mühiti və poeziyası” adlı elmi işi ilə şərqşünaslıq üzrə fəlsəfə doktoru elmi dərəcəsi aldığına diqqət çəkmiş, özünün də Nizaminin qəhrəmanı Şirinin şərəfinə adlandırıldığını qeyd etmişdir. Professor Şirinxanım atasının yolunu davam etdirərək, bütün elmi fəaliyyətini nizamişünaslığa həsr etdiyini vurğulamışdır. Sonra dəvətli məruzəçilərdən professor Ahmed - Kader el Shazli (Misir), professor Mustafa İsen (Türkiyə), Dr. Firuz Fevzi (Əfqanıstan), Alireza Qiyaməti (İran) Nizami Gəncəvinin Azərbaycanın övladı olduğunu, onun təkcə türk, ərəb və fars mədəniyyətinə məxsus mütəfəkkir deyil, bir dünya şairi olduğu düşüncəsini önə çəkmişlər.

Böyük Azərbaycan şairi Nizami Gəncəviyə həsr olunmuş beynəlxalq konfrans öz işini bölmə iclaslarında davam etdirmişdir. Konfransda, həmçinin, Azərbaycanın tanınmış xalçaçı rəssamı, Xəzər Universitetinin Musiqi və incəsənət departamentinin müəllimi Afaq Kərimovanın Nizami Gəncəviyə həsr olunmuş sənət əsərləri nümayiş olunmuşdur.

EurasiaDiary © Xəbərlərdən istifadə zamanı hiperlinklə istinad olunmalıdır.