“Rüstəm İbrahimbəyovun vəfatı çox böyük itkidir. Elə adamlar hər zaman doğulmurlar”.
Bunu Ednews-a özəl açıqlamasında Xalq artisti, tanınmış teatr və kino aktyoru Hacı İsmayılov görkəmli mədəniyyət xadimi Rüstəm İbrahimbəyovun vəfatı ilə bağlı fikirlərini bölüşərkən deyib.
O, Rüstəm İbrahimbəyovu tanıyanlara, doğmalarına, yaxınlarına başsağlığı verib.
“Rüstəm İbrahimbəyov mənim üçün çox doğma bir insan olub. Çox ziyalı kinodrammaturq, kinorejissor idi. Onunla bizim ilk iş birliyimiz “Ad günü” filmindən başlayıb. Film onun “Ad günü” və “Ezamiyyət” hekayələrinin birləşdiyi ssenari əsasında çəkilmişdi. Filmin ssenari müəllifi, rejissor, iki aktyor və bir rəssam dövlət mükafatı aldı. Çox gözəl günlər idi. Belə bir kino xadimi ilə yaxından tanış olmaq çox sevindirici hal idi.
Sonradan onun ssenarisi əsasında daha dörd “Bağlı qapı qarşısında”, “Ölsəm bağışla”, Həm ziyarət həm ticarət”, “Özgə həyat” filmlərində çəkilmişəm.
Onu ilk dəfə “Ad günü” filminin çəkilişlərində Rasim Ocaqovla şirin söhbət edərkən gördüm, hərdən mənə tərəf də dönüb baxırdı, adi qəbul etdim bilmirdim Rüstəm İbrahimbəyovdur. Ona kimi adını eşitmişdim amma görməmişdim. Digər filmlərdə çəkiləndə yaxından tanış olduq. Bizim Akademik Milli Dram Teatrında “Biganələr oteli” pyesi əsasında qoyulan tamaşada mən də rol almışdım. Rejissoru Azərpaşa Nemətov idi. Tamaşanın premyerasında Rüstəm İbrahimbəyov gəlmişdi.
Onu itirməyimiz bizə çox pis təsir etdi. Belə bir ağrını o vaxt Rasim Ocaqov dünyasını dəyişəndə hiss etmişdim.
Rüstəm İbrahimbəyov çox savadlı, dünyaya baxıçı geniş insan idi. Ona görə də onun yazdığı istər hekayələri, istər ssenariləri, istərsə də pyesləri çox fəlsəfi və düşündürücüdür. Əlbəttə mənim üçün onun ssenariləri əsasında filmlərində çəkilmək çox sevindirici idi. Onun ölümü tanıyanlar üçün ağırdır. Allah rəhmət eləsin, ruhu şad olsun”.
Gülnar Səlimova