Əməkdar incəsənət xadimi Aydın Kazımzadə Mədəniyyət Nazirliyindən incikdir.
O, bu barədə Ednews-a açıqlaması zamanı deyib. Qocaman ustad bildirib ki, təcrübəli bir film mütəxəssisi kimi yazdığı kitab Mədəniyyət Nazirliyi tərəfindən qəbul edilməyib.
““Ekran arxasındakı həyat” adlı xatirə kitabı yazdım. Kitabda 58 il ərzində şahidi olduğum məsələlər yer alırdı. Kitabın çap olunması üçün Mədəniyyət Nazirliyinə müraciət etdim. Lakin Nazirliyin nəşriyyat şöbəsi yazımı qəbul etmədi. Mənə bildirdilər ki, kitabın dərc edilməsi üçün komissiya yaradılmalıdır və mütəxəssis nəşrə rəy verməlidir. Bidirim ki, mən kino ilə bağlı 30-dan artıq kitab yazmışam. Nazirlik də qərar verdi ki, 82 yaşında kinoda 58 il iş stajı olan adamın kitabını müzakirəyə qoyacaqdılar. Mən hər zaman maarifəndirici kitablar yazmışam, çalışmışam nəşrlərimdə kino sahəsinin bütün incəliklərini göstərim ki, gənc nəsil bununla bağlı hansısa bilikləri əldə etsinlər.
İnanırsız, Nazirlikdən kitabımla bağlı heç bir xəbər çıxmadı və özləri kitabı çap etməmək haqqında qərarı verdilər. Heç sayıb, məni çağırmadılar da. Mən də kitabımı öz hesabıma çap etdirdim və 6000 manat ziyana düşdüm. İndi də banka hər ay 500 manat kredit ödəyirəm. Əgər kino da bu formada olsa, işimiz düzəldi. Ancaq mən hər zaman yaxşı nəticələrə inanmışam və ümidimi heç vaxt itirmirəm”.
Kinoşünas yeni yaradılacaq Kino Agentliyi ilə də bağlı fikirlərini Ednews-la bölüşüb. Aydın Kazımzadə ona böyük ümid bəslədiyini də bildirib. O, inanır ki, yenilik tezliklə Azərbaycan kinosuna müsbət tərəfdən öz töhvəsini verəcək.
“Arzu edirəm ki, Agentlik tərəfindən ssenarilərə şəffaf qiymət verilsin, xaricə kino festivalına göndəriləndə kiminsə istəyilə deyil, obyektiv qiymətləndirmə olsun. Kino sahəsi artıq bir neçə dəfə struktur olaraq adını dəyişib, amma keyfiyyət dəyişikliyi olmayıb. Çünki onun başında duranlar kinonu bilən adamlar olsa da rəhbərlikdə səriştələri olmayıb. Arzu edirəm ki, yeni agentliyin rəhbərliyi bu kinonun təşkilini bilən adam olsun ki, nəticələr də ürək açan olsun”.
Söhbət əsnasında əməkdar incəsənət xadimi bildirib ki, televiziyalarda nümayiş olunan serialların ssenariləri zəif olsa da, çəkilən bayağı filmlərdən keyfiyyətcə bir xeyli irəlidir.
“Seriallar dünyanın əksər ölkəsində bizdəki kimidir. Bizdə yeni başlayıblar serial çəkməyə, amma Türkiyədə bu sahədə artıq ixtisaslaşma gedib. Nə qədər gəncimiz ixtisasa yiyələnib, amma iş tapmır. Bu seriallar gənc aktyorlar, rejissor və operatorlara təcrübə qazandırır. Yetər ki, kütlə “Stalinin başı”, “Xoxan”, “Qız qaçırtma” kimi filmlərə baxmasın. Kütlənin zövqünü onsuz da bayağı filmlərlə korlayıblar...”.
Kino mütəxəssisi deyir ki, köhnə filmlər içərisində də elələri var ki, zəif olsa da tamaşaçı filmidir. Onun fikrincə, “Ulduz”, “Əhməd Haradadır” filmləri bu nümunələrdəndir.
“Məsələn sovet dönəmində çəkilən filmlər “Ulduz”, “Əhməd haradadır”, “Bəxt üzüyü” çəkiliş və ssenari baxımından zəif film sayılsa da, tamaşaçı kütləsinin xoşuna gəlirdi. O filmlərdə maarifləndirici məqamlar olduğuna görə, biz onları qəbul edirik. İndiki bu filmlər isə uşaq oyunlarına bənzəyir. Usta sənətkarları belə həmin filmə çəkəndə yenə də bəsit alınır. Çünki ssenari çox pisdir. Düşünür ki, pulum var, film çəkirəm. Bunun qarşısını almaq mümkün deyil”.
Gülnar Səlimova