“Çox qürurluyam. Çox təşəkkür edirəm. Zatən Zəfər bayramından sonra bizim əhval-ruhiyyəmiz çox yaxşıdır. İndi daha da böyük ilhamla gözəl əsərlər yazmağa çalışacam”.
Bu fikirləri Ednews-a Xalq artisti, Bəstəkarlar ittifaqının sədri Firəngiz Əlizadə “Azərbaycan Respublikası Prezidentinin fəxri diplomu” ilə təltif edilməsi barədə danışarkən deyib.
“Prezident İlham Əliyevə incəsənətə, mədəniyyətə göstərdiyi xüsusi diqqətə görə təşəkkür edirəm”.
Söhbət əsnasında bəstəkarın doğum gününü də təbrik edib, özəl günü necə keçirəcəyi ilə maraqlandıq. O, həmin günü ailəsi ilə birlikdə olacağını bildirdi.
Qeyd edək ki, görkəmli bəstəkar Firəngiz Əlizadə 1947-ci il mayın 28-də Bakıda anadan olub. İlk musiqi təhsilini Azərbaycan Dövlət Konservatoriyasının nəzdində xüsusi istedadlı uşaqlar üçün orta ixtisas musiqi məktəbində alıb. Daha sonra Azərbaycan Dövlət Konservatoriyasında bəstəkarlıq və fortepiano ixtisasları üzrə təhsil alıb. Həm bəstəkarlıq (1972-ci il, professor Qara Qarayevin sinfi), həm də fortepiano ixtisası üzrə (1970-ci il, professor Urfan Xəlilovun sinfi) konservatoriyanı fərqlənmə diplomu ilə bitirib. 1970-ci ildən Azərbaycan Dövlət Konservatoriysında (indiki Bakı Musiqi Akademiyası) pedaqoji fəaliyyətlə məşğul olmağa başlayıb, 1972–1974-cü illər ərzində Qara Qarayevin assistenti kimi fəaliyyət göstərib.
Gülnar Səlimova
