İyulun 20-də Yaşıl teatrın səhnəsində Sound Pro Media Group-un təşkilatçılığı ilə Xalq artisti Eyyub Yaqubovun konserti baş tutub. Konserti Big Band Sound pro orkestri müşayiət edib.
E.Yaqubov klassik hitləri ilə yanaşı, yeni mahnılarını da konsert iştirakçılarına təqdim edib.
Ednews xəbər verir ki, konsertin bədii rəhbəri, estrada müğənnisi Fuad Musayev tədbir öncəsi jurnalitlərə açıqlamasında Eyyub Yaqubovla birlikdə çalışdığı üçün böyük sevinc hissi yaşadığını bildirib.
“Bütün biletlər hamısı satılıb, bu da Eyyub bəyin necə sevildiyinin bir nümunəsidir. Məni bədii rəhbər olaraq Xalq artisti özü dəvət edib, mən də sevə-sevə qəbul etmişəm. Tamaşaçıları bu konsertdə keyfiyyətli musiqi gözləyir”.
Tədbirin aparıcısı Əməkdar artist Elnur Kərimov olub. O səhnədən bütün jurnalistləri qarşıda gələn Mətbuat günü münasibəti ilə təbrik edib.
Xalq artisti mediaya açıqlamasında illərdir təcrübəsinin olmasına baxmayaraq, ilk günkü qədər həyəcanlı olduğunu bildirib.
“Sevinirəm ki, Bakımızın gözəl məkanında növbəti konsertimizi veririk. Əziz tamaşaçılarımla görüşmək mənim üçün çox xoşdur. Hər kəsə sevgi dolu günlər arzu edirəm”.
Konsertdə Dövlət Televiziyasının solisti Fuad Musayev Azərbaycan və dünya musiqisindən nümunələr səsləndirib. Onun Natavan Cəbizadə ilə oxuduğu "Şuşa, qayıdışın mübarək!" (" Шуша, с возвращением домой! ") dinləyənlərin zövqünü oxşayıb. Daha sonra Xalq artisti cazmen Cavan Zeynallının ifaları tədbirə rəng qatıb.
Gecənin kulminasiyasi isə Eyyub Yaqubovun və Cavan Zeynallının piano dueti olub.Gecə anşlaqla başa çatıb.
Qeyd edək ki, Eyyub Yaqubov eyni konsert proqramı ilə bugün də Yaşıl teatrda çıxış edəcək.