Türkiyənin məşhur müğənnisi Cem Adrian 15 oktyabr Bakı Konqres Mərkəzində möhtəşəm konsert verib.
Ednews-un verdiyi məlumata görə, konsert “Event office”-in təşkilatçılığı ilə, 2 saat gecikmə ilə başlayıb.
Səbəb isə “Azərbaycan Hava Yolları” (AZAL) aviaşirkətinin J2-076 nömrəli İstanbul-Bakı reysini yerinə yetirən hava gəmisinin kapitanı texniki səbəbdən (ön şüşənin çatlaması) uçuş hava limanına qayıtmaq qərarı olub. Geri dönüş edən təyyarədə türkiyəli müğənni Cem Adrianın komandası da olub. Amma müğənni özünü pərəstişkarlarna "Türk hava yolları"ilə çatdırıb:
"Sizi sevirəm.Möhtəşəmsiz. Burda olmağıma çox şadam", deyən müğənni konserti "Sen Benim Şarkılarımsın" ifası ilə açıb.
Müğənniliklə yanaşı, bəstəkar, prodüser və rejissor olan Adrianın səs diapazonu basdan sopranoyadəkdir.
Musiqi karyerasına 18 yaşında başlayıb. "Ben bu şarkıyı sana yazdım" adlı ilk albomunu 2005-ci ildə buraxıb. Albom 16 min tirajla satılıb. Üç il sonra isə Adrianın "Essentials /Seçkiler" və "Emir" adlı iki albomu birdən çıxdı. Bir neçə dəfə "Altın kelebek" mükafatının "İlin mahnısı", "İlin müğənnisi" kateqoriyalarında qalib olub.
Cem Adrian musiqidə sərhədlər, tərzlər və qaydalardan kənardı. Özünü sadəcə “özgür bir müzisyen” olaraq adlandıran C.Adrian konsertdə güclü səsi və möhtəşəm performansı ilə sevənlərinə musiqi dolu saatlar yaşadıb. " Sarı gəlin"i zalla birgə ifa edən müğənni, etiraf edib ki, azərbaycanlılar çox istedadlıdırlar və ifaları möhtəşəmdir.
Konsertin davamında o, səhnədə sevilən əsərlərini səsləndirib. Onların arasında müğənninin "Bən seni çok sevdim", " Mehriban", Mutlu yıllar", "Yıldizların altında", "Ayrılık", "Küçük adam", " Kül" və s. kimi sevilən mahnıları da olub.
Konsertdə müğənni həm də Halil Sezainin " Üsyan" mahnısını da tamaşaçılarına ərməğan edib.
Cem Adrianın konserti böyük çoşqu ilə keçib.
Günel Həsənova