Xəbər verdiyimiz kimi Xalq yazıçısı Anar növbəti dəfə Azərbaycan Yazıçılar Birliyinin (AYB) sədri seçilib.

Ednews Anarın yenidən AYB sədri seçilməsi ilə bağlı yazıçı və şairlərin fikirlərini öyrənib. Cavabları təqdim edirik.

Xalq şairi Sabir Rüstəmxanlı:

“Anar bəyi ürəkdən təbrik edir, ona uzun ömür, can sağlığı arzulayıram”.

Yazıçı Zahid Xəlil:

“Anarın yenidən AYB sədri olmasına mən də səs vermişəm. Belə güman edirəm ki, hazırda bu ən doğru seçimdir. Çünki o elə bir şəxsiyyətdir ki, bu təşkilatın yaşaması üçün minimum iqtisadi məsələləri həll etmək gücünə malikdir”.

Yazıçı Seyran Səxavət:

“Anarın yenidən AYB sədri olmağına münasibətim çox yaxşıdır. Ondan yaxşısı olsa ona səs verərdim. Məncə, Anarın alternativi yoxdur. Çünki, o, nüfuzlu adamadır. Böyük yazıçı, böyük insan, eyni zamanda böyük ziyalıdır. Yazıçılar Birliyi idman zalı deyil. Anara irad tuturlar ki, guya yaşlıdır. Elə cavanlar var ki, zehni yaşları 90-dır. Anarın zehni cavandır”.

Şair Rasim Qaraca:

“Anarın yenidən sədr olunmağına pis baxıram. Bu o deməkdir ki, ədəbiyyat prosesi yenə durğun halında qalacaq, əsərlər müzakirə olunmayacaq, ədəbi-tənqid yenə ədəbi-tərif olacaq, gənc yazarlar təqaüd almaqdan ötrü ikiüzlülük edəcəklər, ədəbiyyat festivalları keçirilməyəcək, mükafat sistemi yaranmayacaq, 2-ci dərəcəlilər, qrafomanlar önə çıxacaq, istedadlı gənclər dışlanacaq. Təkcə ədəbiyyatımız deyil, ümumən mədəniyyətimiz bataqlıq içərisindədir, sonu bilinməyən tənəzzül prosesi gedir. Ən acınacaqlısı, istedadlı gənc yazarların ədəbiyyat generallarına yaltaqlanmaq yolu tutmasıdır”.

Şair Aqşin Yenisey:

“Anarı təbrik edirəm. Əla xəbərdir. Fəaliyyətində uğurlar arzulayıram. Anar müəllimdən daha böyük nailiyyətlər gözləyirəm. Nəinki Azərbaycanda, dünyada Anar müəllimin alternativi yoxdur. Olmayıb, olmayacaq da”.

Yazar Günel Natiq:

“AYB üzvü kimi Anarın yenidən sədr seçilməyinə münasibətim müsbətdir. Anar mənim yeniyetməlik çağında həyata baxışımda rol oynamış əsərin müəllifidir. Bundan əlavə, Anar azarbaycanlı xarakterinin  özəyinə kimi bilən azsaylı yazıçılardandır. Düşünürəm ki, bizi olduğumuz kimi görən, azərbaycanlı ruhunu ədəbiyyatda ustalıqla yansıdan Anar müəllimin AYB sədrliyi mühitimizin söz adamlarına faydalı olmalıdır”.

Xatırladaq ki, AYB-nin sonuncu qurultayı 2014-cü ildə keçirilib və Xalq yazıçısı Anar sədr seçilib. O, 1987-ci ildən Birliyin sədridir.

Oğuz Ayvaz