Fevralın 8-də 28 Mall Cinema Plus kinoteatrında "Bir qatilin etirafı" adlı qısametrajlı filmin təqdimatı keçirilib.
Ednews-un verdiyi məlumata görə, filmin hazırlanması MEDİ-ART Psixi Sağlamlıq Mərkəzinin təşəbbüsü ilə hazırlanıb və film hər 6 saniyədə dünyada 1 nəfərin ölümünə fərman verən qatildən-siqaretin zərərlərindən bəhs edib.
Qeyd edək ki, “Bir qatilin etirafı” qısa metrajlı filmin təqdimatına millət vəkilləri Jalə Əliyeva, İlham Məmmədov, Bəhruz Məhərrəmov, tanınmış həkimlər, ictimaiyyət nümayəndələri, eləcə də media mənsubları iştirak edib.
MEDİ-ART Psixi Sağlamlıq Mərkəzinin rəhbəri, Tibb Elmləri Doktoru, psixiatr narkoloq, psixoterapevt Araz Əliquliyevin sözlərinə görə, film 9 fevral - Ümumdünya Siqaretdən İmtina Günü ərəfəsində təqdim olunsa da, bu dəhşətli bəla ilə ilin 365 günü mübarizə aparmaq zəruridir.
"Bu sahədə təşviqat işlərini gücləndirmək, azyaşlıların siqaretə mübtəla olmaması üçün məktəblərdə təbliğatı maksimal gücləndirmək lazımdır. Tədris ocaqları təkcə elm verməklə deyil, həm də cəmiyyətdə sağlam vətəndaşın yetişdirilməsilə bilavasitə məşğul olmalıdır," deyə, ekspert çıxışında vurğulayıb.
Təqdimatdın ardınca həkim-terapevt, millət vəkili İlham Məmmədov da siqaretin zərərli təsirləri barə danışıb. O, qeyd edib ki, siqaret aludəçiliyi həm də beyində yaranan psixoloji refleksiya ilə bağlıdır.
"Biz bu cür zərərli vərdişləri səhhətimiz üçün daha xeyirli olan gündəlik məşğuliyyətlərlə, məsələn səhər durarkən siqareti damağımıza deyil, dişlərimizi fırçalamağı, kofe hazırlayıb gözəl bir səhər yeməyi hazırlamağı adət edərək əvəz etməliyik".
Fİlmə gəlincə, “Bir qatilin etirafı” qısametrajlı filmin anti-qəhrəmanı cəlbedici qız obrazında olan siqaretdir. Film boyu bir gəncin beynini dumanlandıran, onu hər vasitə ilə cəngindən buraxmamağa çalışan bu qatil sonda məqsədinə çatır. Filmin sloqanında da cərəyan edən hadisələrə, süjet xəttinə uyğun olaraq, seçilib: "Siqaret deyil, asılılıq öldürür!”.
Filmin baş prodüseri, aparıcı Firuzə Cəlilovanın sözləri ilə desək, “Əgər sən asılılıqlara meyllisənsə, o zaman siqaret olmasa belə, həyatında başqa kabus tapacaqsan.”
Ednews həmin filmin tam versiyasını sizlərə təqdim edir:
