Bu gün Azərbaycanın Ümummilli Lideri Heydər Əliyevin doğum günüdür. Ulu Öndərin anadan olmasının 100-cü ildönümüdür.

Azərbaycan xalqının ümummilli lideri Heydər Əliyev öz xilaskarlıq missiyası ilə ölkəmizin müstəqilliyini qorudu və inkişafın təməlini qoydu.

Bu şanlı tarix səhifəsini yaradan isə yenə də Azərbaycanın inkişafında, müstəqilliyində, gələcəyində müstəsna rol oynayan, daim xalqına arxalanan və xalqa arxa olan bir insan – Heydər Əliyevdir. Heydər Əliyev yalnız Azərbaycan Respublikasının Prezidenti olmayıb, ən çətin dövrlərdən birində vətəninin xilasına gəlmiş, ölkəni dirçəliş və tərəqqiyə, çiçəklənməyə aparan Azərbaycan xalqının ümummilli lideridir. Heydər Əliyevin təkcə Azərbaycanın siyasi, iqtisadi həyatında deyil, həmçinin incəsənət tarixində də misilsiz töhfələri olub. 

Bəs, dünya miqyaslı siyasətçi, böyük insan yaddaşlarda necə qalıb?

Ednews Xalq artisti Sadıq Zərbəliyevin Ulu Öndərlə bağlı xatirəsini öyrənib. Sənətçi əməkdaşımızla söhbətində Heydər Əliyevi əfsanəvi şəxsiyyət adlandırdı. O, bildirib ki, H.Əliyevin həm ölkəmizə, həm də sənətimizə verdiyi töhfələr danılmazdır.

“Mən 1991-1993 cü illərdə dəfələrlə Naxçıvanda rəhmətlik Heydər Əliyevin yanında olmuşam. Onunla dəfələrlə görüşmüşəm. Hər dəfə də mən onunla görüşəndə kövrəlirdim, gözlərim dolurdu.

Yadımdadı, bir dəfə onunla görüşəndə dedim ki, “Yoldaş Əliyev Allah mənim ömrümdən kəssin, sizə versin” diqqətlə mənə baxdı, “Qoy, hər kəsənin ömrü özünə qalsın” deyə o, cavab verdi.

“Onun sənət insanlarına xüsusi diqqəti vardı, məni əməkdar artist olmadan birdəfəlik Xalq artisti adına layiq gördü. Türkiyədə Atatürk xalqının himayədarı oldu, Azərbaycanda da Heydər Əliyev, bizim hamımızın lideri, öndərimizdir. Heydər Əliyev əbədi olaraq Azərbaycanla yaşayacaq. O qədər gözəl xatirələrimiz var ki... İnsan  duyğulanır. Heydər Əliyev hər zaman bizim üçün unudulmaz şəxslərdən biri olaraq qalacaq”.

Kazımlı Rübabə