Bu gün Xalq artisti, sevilən aktrisa Afaq Bəşirqızı 68 yaşını qeyd edir.
Ednews bu münasibətlə Afaq xanımın ad günü ilə bağlı açıqlama alıb. O, qeyd edib ki, əslində ad günlərindən danışmaq ən acığı gələn mövzulardandır:
“Sən özün istəməsən də ətrafındakılar, doğmaların, əzizlərin, səni sevənlər ad gününü qeyd edirlər. Artıq dünəndən təbriklər başlayıb. Qeyri-ixtiyari hörmətlə yanaşmalısan. Məni yaradan Tanrıya, anama, atama hörmətdir. Ad günüm üçün xüsusi bir planım yoxdur. Dəbi, göstərişi sevmirəm. Öz ailəmlə, yaxınlarımla qeyd edəcəm. Həm də yubiley yaş günüm də deyil. Azərbaycan xalqına can sağlığı, səbr, dözüm arzulayıram. Özüm də onun içində”.
Qeyd edək ki, Afaq Bəşirqızı 1955-ci ildə Bakı şəhərində anadan olub. 1974-1979-cu illərdə Azərbaycan Mədəniyyət və İncəsənət İnstitutunun mədəni maarif fakültəsində təhsil alıb.
Aktyorluq fəaliyyətinə 1973-cü ildə Lənkəran Dövlət Dram Teartında başlayıb. 1975-ci ildə fəaliyətini Sumqayıt Dövlət Dram Teatrında davam etdirib. Burada klassik və müasir dramaturqların əsərlərində baş rolları ifa edərək, şöhrət qazanıb. Onun "Bəxt üzüyü" tamaşasında yaratdığı Söylü obrazı öz koloritinə, yüksək bədii keyfiyyətlərinə görə klassik nümunədir. 1989-cu ildə Azərbaycan Dövlət Musiqili Komediya Teatrına dəvət alıb. Azərbaycan Mədəniyyət və İncəsənət Universitetində aktyorluq kursunda dərs deyir. Aktrisa Musiqili Komediya Teatrında bir-birindən gözəl rollar yaradıb.
Afaq xanım televiziya tamaşalarında yaratdığı Zəhra xalaqızı ("Yaşıl eynəkli adam"), Suğra ("Bala başa bəla"), Darçınbəyim ("Evləri köndələn yar"), Ayka ("Yarımştat"), Gülya ("Nekroloq") rolları ilə daha da məşhurlaşıb.
Oğuz
