Bu gün türkiyəli aktyor Cüneyt Arkının doğum günüdür. 85 yaşında dünyasını dəyişən türkiyəli aktyor Cüneyt Arkın karyerası boyu həm dram, həm döyüş  janrında filmlərdə rol alıb. Yaraşıqlılığı ilə gənc qadınların könlünü fəth edib. 

Ednews Cüneyt Arkın haqqında maraqlı faktları təqdim edir. 

Əskişəhərin mərkəzində Qaraçay kəndində anadan olub. Babası Qurtuluş Müharibəsinə qatılmış Hacı Yaqub Cüreklibaturdur. Lisey təhsilini Əskişəhər Atatürk Liseyində alıb, 1961-ci ildə İstanbul Tibb Fakültəsindən məzun oldu.

Yeniyetmə vaxtlarında davakar idi. Obrazlarına görə İstanbulda ona tez-tez sataşır,  həqiqətən dava edib etməyəcəyini sınayırdılar. Elə həmin anlarda yaraşıqlı aktyorun içindən sözün həqiqi mənasında Kara Murat çıxırdı. Menecerləri tez-tez onu “döyüş meydanlarından” çəkib çıxarmalı olurdular. Məşhurlaşana qədər isə həyat heç də asan olmamışdı.

Onun çox kasıb uşaqlıq illəri olmuşdu. Türkəm desə də, milliyyətcə noqay idi. Əsl adı Fəxrəddin Cürəklibatır olan məşhur 1937-ci ildə Əskişəhərin  Qaraçay kəndində Qurtuluş Müharibəsi qazisi Hacı Yaqub Cüreklibaturun ailəsində doğulmuşdu. 1961-ci ildə İstanbul Tibb Fakültəsindən məzun olsa da, uzun müddət həkimlik etmədi.

Yeşilçamda rekord qıran və 300-dən çox filmdə baş rollar ifa edib. 20 yaşından 40 yaşına kimi bütün həyatı setlərdə keçib və yorucu tempə baxmayaraq, intizamı ilə hər rolu uğurla həyata keçirməyi bacarıb. 

Cüneyt Arkının ilk evliliyi 1964-ci ildə özü kimi həkim olan Gülər Mocan ilə olub. 4 il davam edən bu ailə həyatından qızı Filiz doğulub. 1968-ci ildə  aktyor həyatının sevgisi Betül Cüreklibatur ilə ailə qurur və bu  nikah ölüm onları ayırana qədər davam edir. Bütün qadınların sevimlisi olan Cüneyt Betülə son dərəcə sədiq idi və onu itirməkdən yamanca qorxurdu: “Heç bir şeydən qorxmadığım qədər həyat yoldaşımı itirməkdən qorxuram. Betülümü itirdiyim an mən də yox olaram!”, - deyə o müsahibələrindən birində demişdi.  Cüneyt Arkının bu evlilikdən Kaan və Murad adlarında iki oğlu var. Murad aktyorluq etsə də atasının şöhrətini qazana bilmədi.

Türkan Şoray, Hülya Koçyiğit, Fatma Girik və Filiz Akınla onlarla filmdə tərəfmüqabili olmuş aktyor “Koroğlu”, “Malqoçoğlu Cem Sultan”, “Haqq yolu”, “Dəli Yusif”, “Dünyanı xilas edən adam”, “Quruluş: Osman” filmlərindəki rolları ilə məşhurlaşıb.

Bir zamanlar şöhrətin zirvələrində olan aktyor alkoqolizmə düçar olsa da, bu bəladan qurtula bilir. Sonralar Arkın alkoqol, narkotik və gənclərin problemləri mövzulu saysız-hesabsız konfranslara qatılmışdı.

Ömrünün son illərində siyasətə qatılan məşhur aktyor millət vəkili seçilmək cəhdləri də etmişdi. Onun düşüncələri də qəhrəmanlarının düşüncələri ilə eyniydi.

O, formada qalmaq üçün etdiyi idmanlara görə yuxusuzluqdan əziyyət çəkirdi. İştirak etdiyi televiziya proqramında gecələr iki saatdan bir oyandığını bildirən Cüneyt Arkın duş qəbul edib əzələlərini rahatlaşdırırdı.

Cüneyt Arkın at sürmə və karate üzrə mütəxəssis idmançı tituluna sahib olub. Aktyorluqla yanaşı, televiziya proqramlarının aparıcısı olub, qısa müddət ərzində qəzetlər üçün köşə yazısı yazıb. 2009-cu ildə onurğasında sinir sıxılması səbəbindən üç aya yaxın xəstəxanada yatıb.

Hollivudun əfsanəvi adı Jan-Klod Van Damm Cüneyt Arkın pərəstişkarıdır. Jan-Klod Van Damm Türkiyəyə gələndə Cüneyt Arkına baş çəkib, imzasını alıb. Əslində ikili Saba Tümerin proqramında bir araya gəlib.

İndiki serial və filmləri keyfiyyətsiz hesab edən məşhur aktyor bu keyfiyyətin texnologiya ilə düz mütənasib olduğunu düşünür. Keçmişdə iş saatlarının uzun olduğunu xatırladan Cüneyt Arkın, çəkiliş meydançasında boş qalanda oynamağa cib telefonu olmadığı üçün uzun müddət şeir, sənət və astronomiyadan danışdıqlarını bildirir.

2022-ci il iyunun 28-də Cüneyt Arkın gözlərini əbədi yumdu. 

Ölümündən sonra aktyorun vəsiyyəti ortaya çıxıb.

Cüneyt Arkın daha əvvəl Bilal Özcanın “Laf aramızda” proqramında iştirak etmiş və söhbət zamanı qazandığı pulla heç vaxt sərmayə etmədiyini demişdi: “Pulun, şöhrətin qədrini bilmədik. Uzun ömür yaşasam, səfalət içində qala bilərəm, ölə bilərəm”.

Atlara xüsusi marağı ilə tanınan Cüneyt Arkın proqramda vəsiyyətini açıqlayıb:

“Atım Həsrətimin yanında dəfn olunmaq istədim. Amma sonra səhv başa düşüləcəyindən qorxdum. “Məni valideynlərimin yanında dəfn edin”, dedim”.

Oğuz