Azərbaycan yazıçıları yay fəslində məhsuldar olur ya passiv? Ednews qələm adamlarına sorğu ünvanlayıb - Yay fəslində yeni nələr yazmısınız? Ümumiyyətlə, istilər yaradıcılığınıza necə təsir edir? Cavabları təqdim edirik:

Xalq yazıçısı Anar:

“Məzuniyyətdə olsam da məhsuldar oluram. Bağda məzuniyyətimi keçirirəm. İstilər mənə mane olmur. Yeni yazılarım da var. Müxtəlif mövzularda yazılar qələmə almışam, bir neçə kitab üzərində işləyirəm. Yeni kitablarım çıxanda oxucuların da bundan xəbəri olacaq”.

Xalq şairi Nəriman Həsənzadə:

“Fəsillərin mənə heç dəxlisi yoxdur, yaradıcılığa fasilə vermək olmaz. Son vaxtlar yeni şeirlər yazmışam. Ədəbiyyat qəzetində yayımlanacaq. Şeirlərimin əsas mövzusu vətən və ictimaiyyətdir. Yaradıcılıq istirahətdir, onun sevinci sonradan hiss edilir. Kitab çıxartmağı planlaşdırmıram, amma nə zamansa ol bilər”.

Yazıçı Səfər Alışarlı:

"Yay isti keçdiyi qədər də ağır keçir. 9 saylı Binəqədi ikinci seçki dairəsindən deputatlığa namizədəm. İki həftə imza topladıq, indi də təbliğata başlamışıq. Nəsə yazmaq mümkün deyil. Keçən ay ilk dəfə Şuşada oldum. Bir ömürlük xatirədir Şuşa səfəri".

Yazıçı Xanəmir Telmanoğlu:

“Fəsillərin yazı yazmağıma heç bir təsiri olmur. Əksinə, istilərdə, yay aylarında daha da aktivləşirəm. Bir-iki  irihəcmli əsərim var ki, hələ də üzərində iş gedir.

Sadəcə olaraq qayğılar və iş adamı elə məşğul edir ki, yazı yazmaq üçün Allaha yalvarırsan ki, imkan varsa, mənə yazı yazmaq üçün vaxt ver. Bir zamanlar bəzi  yaşlı həmkarlarımdan bu sözləri eşidəndə, gülməyim gəlirdi”.

Şair Rəbiqə Nazimqızı:

“Yay fəslində adətən az yazıram. Bu fəsil mənim üçün qeyri-məhsuldar dövrdür. Ümumiyyətlə, yayı sevmirəm, yaradıcılıq enerjim tükənir. İstiləri heç sevmirəm.  Ürəyimcə olmasa da 3-4 şeir yazmışam, payızı gözləyirəm. 

Yazar Fəridə:

“Mən çoxdandır ki, heç nə yazmıram. İstilər və yayla əlaqəsi yoxdur. Hazırda yaradıclığım quraqlıq dövrünü yaşayır”.