Azərbaycanın Mərakeşdəki Səfirliyinin təşəbbüsü və dəstəyi ilə Azərbaycan Rabat Amerikan Məktəbində keçirilən “Bir Cəmiyyət – Çoxsaylı Mədəniyyətlər” devizi altında təşkil olunan Mədəniyyət Günündə layiqincə təmsil olunub.
"EDnews "xəbər verir ki, tədbirə Amerika Birləşmiş Ştatları, Türkiyə, Kanada, Çin, Fransa, Almaniya, Hindistan, Yaponiya, Braziliya, İspaniya və Cənubi Afrika da daxil olmaqla ümumilikdə 19 ölkə qatılıb. Azərbaycan isə öz zəngin mədəni irsi ilə tədbir iştirakçılarının xüsusi marağına səbəb olub.
Azərbaycan stendində qonaqlara milli mətbəximizin seçmə nümunələri – göyərtili, pendirli və ətli qutablar təqdim olunub. Həmçinin ləbləbi, şəkərbura, paxlava, qoğal, Qarabağ kətəsi və badambura kimi milli şirniyyatlarımız tədbirə gələnlərin böyük rəğbətini qazanıb. Balxurma şirkətinin təqdim etdiyi məhsullar isə xüsusi maraqla qarşılanıb.
Tədbir çərçivəsində “Nərgiz” jurnalının təşəbbüsü ilə dərc olunmuş “Əlifba. Cultural alphabet” kitabı məktəbin kitabxanasına hədiyyə olunub.
Milli ornamentlərlə bəzədilmiş, zəngin kulinariya nümunələri və qonaqpərvər atmosferi ilə seçilən Azərbaycan stendi tədbirin ən çox ziyarət edilən məkanlarından biri olub.
Mədəniyyət Günü müxtəlif xalqlar arasında dostluğun və qarşılıqlı anlaşmanın möhkəmləndirilməsinə xidmət edən, multikultural dəyərlərin təbliğ olunduğu əlamətdar bir tədbirə çevrilib. Azərbaycanın Rabatdakı Səfirliyinin təşəbbüsü və fəal dəstəyi ilə ölkəmiz bu beynəlxalq platformada öz zəngin mədəni irsi ilə yaddaqalan bir iz qoyub.
Fatimə Mərdanlı // EDnews
