Böyük Britaniyada bu yaz mövsümü quraqlıq baxımından rekord göstəriciyə doğru irəliləyir.

“EDnews” xəbər verir ki, ölkənin bəzi bölgələrində həftənin əvvəlində leysan yağışları və ildırımlar müşahidə olunsa da, ümumilikdə isti və quru hava şəraiti üstünlük təşkil edir. Bu tendensiyanın azı 10 gün davam edəcəyi gözlənilir. Milli Hidrometeorologiya Xidmətinin məlumatına görə, cari yaz fəsli indiyə qədər qeydə alınmış ən quraq bahar kimi qiymətləndirilir.

Qeyd olunub ki, hazırda su anbarlarının vəziyyəti qənaətbəxşdir, lakin yay aylarında quraqlıq riski orta səviyyədə qiymətləndirilir. London, Hempşir, Mançester və Yorkşir bölgələrinin bəzi hissələrində artıq 20 gündür ki, bir millimetr belə yağıntı düşməyib. Digər ərazilərdə az miqdarda yağış qeydə alınsa da, may ayı üzrə ümumi yağıntı normadan xeyli aşağıdır. Mart ayında başlayan bahar fəsli ərzində Uels və İngiltərənin cənub-qərb bölgələrində kifayət qədər yağıntı olsa da, ümumi göstəricilər aşağıdır.

Quraqlıqla yanaşı, günəşli günlərin sayında da rekordlar qeydə alınıb. Aprel ayı Böyük Britaniya tarixində ən günəşli aprel olub. May ayında da günəşli günlərin sayı orta göstəricilərdən yüksəkdir.

Fatimə Mərdanlı //EDnews