Vətən müharibəsindən sonra dövriyyəyə buraxılan 500 manatlıq nominal əskinaslar hesablara daxil edilmə və pul köçürmələri zamanı qəbul edilsə də gündəlik istifadədə çətinlik yaradır. Təcrübədən demək olar ki, 200 manatlıq əskinasları istifadə edərkən eyni problem yaşanıb.
Belə olan halda 500 manatlıq əskinas dövriyyə bazarında nə kimi çətinlik törədəcək? Çünki insanlar pul xırdalamaq üçün banklara çox az halda gedirlər.
İqtisadçı ekspert Natiq Cəfərli qeyd edib ki, iri nominallı əskinasların dövriyyəyə buraxılması və ticarətdə istifadə edilməsi müəyyən problemlər yaradır. O, bu barədə Ednews-a açıqlaması zamanı deyib.
.png)
“Ən azından kiçik və orta sahibkarlar üçün dükanlarda və kafelərdə əskinası qəbul edib, qalıq qaytarmaq bəzən ciddi problemə çevrilir. Ona görə də bu vəsaitin dövriyyədə həcminin böyük olmamasını nəzərə alaraq düşünmürəm ki, onun kütləvi hal alsın və böyük problemlərə səbəb olsun”.
Ekspertin fikrincə, bu məsələdə əhalinin davranış qaydalarını da nəzərə almaq lazımdır.
“Kimin əlinə 200 və ya 500 manatlıq keçirsə çalışır onu ehtiyat üçün yığsın. Burada psixoloji məqam da var. Kimin imkanı varsa, həmin o vəsaiti yığıma yönəldir və manatını, yastıq altındakı vəsaitini 200 və ya 500 manatlıq əskinaslarda saxlamağı düşünür. Ona görə də dövriyyədə, ən azından gündəlik həyatda o qədər də tez-tez rast gəlinməyən bir məsələdir. Ancaq bəzən xərclənən də qalıq qaytarmaq problemə çevrilə bilir”.
Qeyd edək ki, 200 manatlıq əskinas 2018-ci ilin 24 mayından dövriyyədədir. Son dekadada ölkə iqtisadiyyatının dinamik inkişafını, dövriyyədə olan nağd pulun strukturunda baş verən dəyişiklikləri nəzərə alaraq eləcə də nağd pul sferasında səmərəliliyin yüksəldilməsinin təmin edilməsi məqsədilə tədavülə buraxılmasına qərar verilib. 200 manatlıq əsginaslar müasir memarlıq mövzusuna həsr olunub.
500 manat nominallı xatirə pul nişanı Ali Baş Komandan İlham Əliyevin rəhbərliyi ilə Qarabağın azadlığı uğrunda 2020-ci ildə aparılmış 44 günlük Vətən müharibəsində Azərbaycan ordusunun tarixi zəfəri münasibəti ilə Azərbaycan Mərkəzi Bankı tərəfindən 04 noyabr 2021-ci il tarixində tədavülə buraxılıb. 500 manat nominallı bu xatirə pul nişanı məhdud sayda (1 mln. ədəd) istehsal olunub və onun istehsal limitinin artırılması nəzərdə tutulmur".
Gülnar Səlimova
.jpg)
