Milli Məclisin iclasında 2023-cü ilin dövlət büdcə layihəsinin müzakirəsi zamanı deputat Vahid Əhmədov Azərbaycanda orta aylıq əməkhaqlarının artırılmasını təklif edib.
Bəs, indiki bahalaşmanı nəzərə alsaq orta əməkhaqqı nə qədər olmalıdır?
“Hökümət 2022 ci ilin sonlarında inflyasiyanı 15 faiz olacağını proqnoz edir. 2023-cü ildə əməkhaqlarında 7.1 faiz artım müşahidə olunacaq. Amma bu nominal qiymətlərdir”.
Bu sözləri Ednews-a açıqlamasında iqtisadçı Elçin Rəşidov bildirib.
“Reallıqda inflyasiya dərəcəsi daha yüksəkdir. Onun hesablanması şəffaf şəkildə aparılmadığı üçün yüksək görülmür. Bu o deməkdir ki 7.1 faiz əhalinin əməkhaqqlarında artım gözlənilir. Real qiymətlərlə işləsələr bunun artım olmadığını görə bilərlər. Dövlətin təqdim etdiyi rəsmi rəqəmlərə güvənsək belə 15 faiz inflyasiya olacaq amma əməkhaqqlarında 7 faiz artım müşahidə olunacaq.Yəni nominal qiymətlərlə gözlənilən inflyasiyadan yuxarı qiymətə qaldırmaq lazımdır ki, ölkədə yaşayış səviyyəsi heç olmasa 2022-ci ildəki səviyyəsində qala bilsin. Baxmayaraq ki, bizə təqdim etdikləri rəqəmlər fərqlidir. Amma bu sahəyə diqqətlə nəzər saldıqda ildən-ilə azalma müşahidə olunur”.
O həmçinin qeyd edib ki , bizim iqtisadiyyatımızın unikallığı ondan ibarətdir ki, əməkhaqlarının artması inflyasiyaya təsir etmir. Bu da Mərkəzi Bankın manatı dollara pərçimləməsi ilə əlaqədardır.
“İqtisadiyyatın sağlam əsaslarla qurulmasının və qeyri- neft sektorunun inkişafının tərəfdarıyam. Milli Məclisdə maaşların artırılmasını tələb edirlər. Bildirmək lazımdır ki özəl sektorda maaşların artırılmasına dövlət qərar verə bilmir. Bu bazar iqtisadiyyatıdır. Hesab edirəm ki, uzunmüddətli strategiyadan yararlanıb ölkə iqtisadiyyatını daha sağlam yollarla idarə edərək qeyri-neft sektorunu inkişaf etdirmək lazımdır”.
Ayan Rzayeva