Hər dəfə pensiyaların artımı ilə ərzaqların bahalaşması ilə nəticələnir. Bu isə insanlarda sevincdən çox həyəcan və təlaşa səbəb olur. Bu demək olar ki, günümüzün reallığına uyğun olaraq cəmiyyətimizdə bir tendensiya xarakteri alıb. Əmək və Əhalinin Sosial Müdafiəsi fondu növbəti ilin yanvar ayından bütün növ pensiyaların təxminən 15% artırılacağını bildirib.
Sosial müavinətlərdə artım yenidən bahalaşmaya səbəb olacaqmı? İqtisadçı ekspert Əkrəm Həsənov məsələni Ednews-a belə şərh edib:
“Pensiyaların 15% artırılması qiymətlərin bahalaşmasını qarşılamaya bilər. Burada nəzərə almalıyıq ki, qiymət artımı hətta 15%-dən də daha yüksək ola bilər. Mən bunu Mərkəzi Bankın məlumatına əsasən demirəm, çünki Mərkəzi Bank həmişə qiymət artımını aşağı hesabla bildirir,” – deyə iqtisadçı vurğulayıb.
Ekspert ölkədə inflyasiya həddinin artması ilə bağlı da bəzi məqamlara toxunub:
“Ümumiyyətlə Azərbaycanda rəsmi statistikaya görə guya inflyasiya həddinin 15 %-dən aşağı olduğu deyilir. Halbuki, bunu hamımız bilirik ki, rəqəmlər deyildiyindən yüksəkdir. Təəssüflər olsun ki, pensiyaların artırılması inflyasiyanın artmasının qarşısını almayacaq. Hətta bunu dəqiqliklə göstərə bilməsəm də, deyə bilərəm ki, bütün sahələrdə qiymətlər xeyli artacaq və bu təkcə Azərbaycanda deyil, dünyanın hər yerində baş verəcək”.
Ekspert bildirib ki, inflyasiyanın artımı təkcə Azərbaycanda gedən proses deyil. O, əlavə edib ki, azərbaycan hökuməti bütün vasitələri maksimum işə salaraq, növbəti ildə inflyasiyanın qarşısını almağa çalışır:
“İnflyasiya artımının səbəbləri daxildə gedən proseslərlə deyil, bu, xüsusilə dünyada gedən proseslərlə bağlıdır”.
Əkrəm Həsənov həmçinin ölkədə günü-gündən süni şəkildə bahalaşan məhsullar üzərində hər hansı dövlət nəzarəti mexanizminin tətbiqi barəsində də söz açıb.
“Süni qiymət artımı əhalini narahat edən ən ciddi məslələrdən biridir. Təəssüf ki, bazar iqtisadiyyatında bunun qarşısını almaq o qədər də asan deyil. Lakin hazırda qiymətlərə Mərkəzi Bank nəzarət edir və ümid olunan budur ki, Mərkəzi Bank bütün banklar arasında şəffaflıq yaratmaq üçün kreditlərin uçot dərəcəsini aşağı salsın. Bəlkə bununla da ölkədə inflyasiya həddi aşağı düşər və qiymətlərə də öz təsirini göstərər”.
Elnur Ənvəroğlu