Son aylarda dünyada neftin bir barelinin təxminən 104 ABŞ dollarından 81 dollara düşərək, 2.8% ucuzlaşması iqtisadi vəziyyətlə bağlı müxtəlif suallar meydana gətirib. Azərbaycanın da neftdən asılı olan ölkələrdən biri olduğunu nəzərə alsaq, bunun ölkə iqtisadiyyatına təsirsiz ötüşməyəcəyini deməyə əsas verə bilər.

Bəs neftin qiyməti davamlı olaraq düşəcəkmi yoxsa...

İqtisadçı ekspert Əyyub Kərimli Ednews-a açıqlaması zamanı deyib ki, dünya neftinin qiyməti Azərbaycan iqtisadiyyatına hər cəhətdən təsir edə bilər. Ekspertin sözlərinə görə, ucuzlaşma bir qədər də davam edərsə, bu birbaşa manatın dəyərinin düşməsinə səbəb ola bilər.

“Dünyada neftin qiymətinin kəskin ucuzlaşması şübhəsiz ki, Azərbaycan iqtisadiyyatı üçün ciddi təzyiqlər yarada bilər. Bu, həm də ölkədə baş verə biləcək devalvasiya deməkdir”.

Əyyub Kərimli neftin son iki ayda ucuzlaşmasına səbəb olan amillərə toxunub: “Neftin qiymətinin sürətlə ucuzlaşması müxtəlif obyektiv və subyektiv amillərə əsaslanır. Bilirsiniz bir müddət öncə biz neft qiymətlərində sürətli artım müşahidə edirdik. Bu gün isə neft bazarında müəyyən səngimə var. Bunun səbəblərindən biri də dünya iqtisadi mərkəzi hesab olunan Çində koronavirus epidemiyasının yenidən tüğyan etməsi və qapanmaların tətbiq olunmasıdır. Digər səbəb isə G7 ölkələrinin Rusiya neftinin qiymətinə embarqo tətbiq etməsi, həmçinin Ukraynada davam edən ağır müharibə prosesidir”.

İqtisadçı hesab edir ki, qarşıdan gələn qış ayı ilə əlaqədar neftə olan tələbat yenidən arta bilər və bu da qiymətlərin artasına səbəb olacaq.

Elnur Ənvəroğlu