Xəbər verdiyimiz kimi, “AzerGold” Qapalı Səhmdar Cəmiyyətinin törəmə şirkəti olan “AzerBlast” Məhdud Məsuliyyətli Cəmiyyəti tərəfindən Gəncə şəhərində ölkədə ilk dəfə olaraq sənaye əhəmiyyətli partlayıcı maddələr istehsal edəcək zavodun inşasına başlanılıb.
İqtisadçı ekspert Xalid Kərimli Ednews-a açıqlamasında bildirib ki, layihənin həyata keçirilməsi ilə mədənlərdə hasilat prosesi və digər sənaye sahələrində istifadə olunan mülki partlayıcı maddələrə olan tələbatın bir qismi yerli istehsal sayəsində ödəniləcək. Bu da idxaldan asılılığın azaldılması, qeyri-neft sektorunun inkişafı, həmçinin regionda yeni iş yerlərinin yaradılması deməkdir:
“AzerGold” və ölkədəki digər mədənçilik sənayesi şirkətlərinin bu cür partlayıcı maddələrə ehtiyacı var. Bu günə kimi şirkət bu maddələri xaricdən idxal edirdi. Belə bir zavodun inşası imkan verəcək ki, şirkət illik 6000 tonla zərərsizlik nöqtəsinə çatsın və rentabelli olsun. Təbii ki, sonradan dünya bazarlarına çıxış imkanı da əldə oluna bilər. Yerli məhsulların istehsalı ilkin mərhələdə idxaldan asılılığı azaldacaq. İdxalın tam ləğv edilməsindən söhbət gedə bilməz. Bunun qarşısını almaq da məqsədəuyğun deyil, rəqabət mühitini saxlamaq vacibdir. Xaricdən idxal olmasa yerli istehsalçılar məhsullarını baha qiymətə satarlar. Zavodun inşası rəqabət mühitini genişləndirəcək. Sözügedən layihə qeyri-neft sektorunun inkişafı və qeyri-neft məhsullarının ixracatına da təkan vermiş olacaq. İlkin mərhələdə idxalın əvəzlənməsi, növbəti mərhələlərdə isə istehsal prosesindən asılı olaraq yəqin ki, ixrac imkanları da nəzərdən keçiriləcək”.
Törə Zeynallı
.jpg)
