Xəbər verdiyimiz kimi, 2017-ci ildən etibarən Azərbaycanla Avropa İttifaqı arasında Strateji Əməkdaşlıq Sazişinin imzalanması istiqamətində aktiv işlər gedir. Artıq bu istiqamətdə ciddi irəliləyişə də nail olunub.
Belə ki, Azərbaycan Prezidenti İlham Əliyev martın 8-də Latviyalı həmkarı Egils Levits ilə görüşdən sonra mətbuata verdiyi bəyanatda sazişlə bağlı irəliləyişlərin olduğunu qeyd edib:
“Biz Strateji Tərəfdaşlıq haqqında Bəyannaməni, yaxud sazişləri Avropa İttifaqının doqquz üzvü ilə imzalamışıq və ya qəbul etmişik. Bu isə üzv dövlətlərin üçdəbiri deməkdir. Bu, Avropa Komissiyası ilə Azərbaycanda hazırda razılaşdırılan müqavilə üçün həqiqətən yaxşı platformadır. Sazişin əksər hissəsi artıq razılaşdırılıb. Biz son addımı atmalıyıq və ümid edirik ki, bu tezliklə baş tutacaq”.
Beynəlxalq Avrasiya Mətbuat Fondunun prezidenti Umud Mirzəyev Ednews-a sözügedən müqavilənin imzalanmasının Azərbaycan iqtisadiyyatı üçün yaradacaq imkanlardan danışıb. O, qeyd edib ki, Strateji Əməkdaşlıq Sazişinin imzalanması haqda müzakirələr uzun müddət idi aparılırdı.
“Bağlanan saziş tərəflərin maraqlarına xidmət edəcəyini düşünürəm. Bu saziş həm Azərbaycan üçün, həm də Avropa üçün faydalı olacaq. Əməkdaşlıq olan yerdə qarşılıqlı əlaqələrdən, münasibətlərdən danışmaq mümkündür. Müqavilənin şərtləri hər iki tərəf arasında əlaqələri möhkəmləndirəcək, yeni imkanların açılmağına yardımcı olacaq. Bu müqavilə ticarət, mədəniyyət və digər müxtəlif sahələrin inkişaf etdirilməsi üçün əlavə imkanların açılmağıdır. Strateji Əməkdaşlıq Sazişinin ölkəmizin iqtisadiyyatına ciddi töhfələr verə biləcəyinə güman edirəm. Bundan başqa Əməkdaşlıq Sazişinin Azərbaycanın idxal və ixrac imkanlarının genişlənməsi, turizm potensialının artması da daxil olmaqla iqtisadiyyatın bütün istiqamətləri üzrə müsbət təsirləri ola bilər”.
U.Mirzəyev söhbət əsnasında onu da əlavə etdi ki, sazişin bütün detalları tam olaraq açıqlanmayıb. Ona görə də rahatlıqla dəqiq, konkret fikirlər söyləmək olmur.
“Çünki sazişdə elə məsələlər öz əksini tapmalıdır ki, Azərbaycanın ərazi bütövlüyü şübhə altına alınmasın və yaxud da müəyyən məsələlərin təxirə salınması ilə bağlı təhdidlər olmasın. Hazırda Qarabağ məsələsi, sülh müqaviləsi həll yolunu tapmayıb. Hər halda sazişin Azərbaycanın gələcəyi üçün uğurlu olacağını proqnozlaşdırıram. Avropanın Azərbaycanla bağlı maraqları böyükdür. Azərbaycan həm iqtisadi resursları, həm strateji mövqeyi, həm yerləşdiyi məkan, həm də meqa layihələrin kəsişdiyi, uzlaşdığı məkanda yerləşir. Bu mənada saziş təkcə ölkəmizin qazanmasına deyil, Avropanın qazanmasına xidmət edəcək”.
Oğuz
