Ednews xəbər verir ki, bu barədə çıxış edən deputat Əli Məsimli Azərbaycanda dövlət zəmanətilə alınan kreditlərin xeyli hissəsinin yanlış istifadə olunduğunu bildirib. Onun sözlərinə görə, bəzi ölkələrdə dövlətin birbaşa borcu az olsa da, dövlət zəmanətilə alınan kreditlər bundan dəfələrlə çoxdur, hətta onların valyuta ehtiyatlarını da üstələyir. 

 

Problemi Ednews-a şərh edən iqtisadçı ekspert Xalid Kərimli qeyd edib ki, dövlət orqanları, dövlət müəssisələri və ya dövlət müəssisəsi olmayan strukturlar dövlət zəmanətilə kredit cəlb edirlər. Bu halda kreditin qaytarılmasına dövlət öhdəlik daşıyır.  

 

“Xatırlayırsınızsa, Beynəlxalq Bank 2015-2016-ci illərdə götürdüyü kreditləri ödəyə bilməmişdi və kredit verənlərlə arasında problemlər yaşanmışdı. Dövlət borcunu qaytarmayanda “defolt” olur. Necə ki, Yunanıstanda, Argentinada, Portuqaliyada belə vəziyyətlər olub. Dövlət götürdüyü kreditləri nə cür yerləşdirməlidir? Burada iki məsələ var. Birincisi, dövlət, adətən, ona görə kredit götürür ki, texnologiyanı idxal edə bilsin, həm də menecment bilikləri əldə etsin, bir sözlə, “ağıllı kredit”. İkincisi isə, büdcə kifayət etmir, hansısa problemləri tez bir zamanda həll etmək üçün kredit götürür.

 

 

Azərbaycanda, ümumiyyətlə, dövlət maliyyəsinin idarəetməsi ilə bağlı problemlər mövcuddur. Maliyyə Nazirliyi şəffaflığı artırmaqçün addımlar atır. Lakin dövlət müəssisələrində vəziyyət qənaətbəxş deyil. Onlar kredit götürürlər, bəzən bunu dövlətin zəmanəti ilə edirlər  və resursların yerləşdirilməsi zamanı nəzarət olunmadığına görə dövlət həmin müəssisələrin cəlb etdiyi kreditlərə öz resursları ilə məsuliyyət daşımağa məcbur qalır. Azərbaycanda dövlət müəssisələrinin cəlb etdiyi kreditlərin səmərəli istifadə edildiyinə, buna nəzarətin yaxşı olduğuna inanmıram. Əslində 2020-ci ildə dövlət müəssisələrinin effektiv idarəetmə sisteminin qurulması üçün dövlət investisiya fondunun yaradılması əsas məqsədlərdən biri idi. Dövlət müəssisələrinin idarəetməsi şəffaflaşmadıqca, korporativ idarəetmə qurulmaqdıqca, peşəkar və etik menecerlər rəhbərliyə cəlb edilmədikcə ciddi problemlər qalmağa davam edəcək. Bu cür kreditlərin götürülməsinə həssaslıqla yanaşılmalıdır ki, dövlətin başı ağrımasın, götürülmüş kreditlər də hansısa məmurların cibinə getməsin".