"Yalnız üçüncü şəxslər (üçüncü tərəf) qarşısındakı məsuliyyətin sığortası icbari ola bilər. Şəxsin öz daşnmaz və daşınan əmlakını sığorta edib- etməməsi onun şəxsi işi olmalıdır. Bizdə isə bunu da icbari ediblər. Əlbəttə başqa ölkələrin də adını tapıb deyə bilərlər ki, filan ölkədə də belədir. Bütün hallarda bu konstitusiyada əks olunmuş mülkiyyət hüququnun pozulmasıdır. Burda maraqlı tərəf sığorta şirkətləridir".
Bu sözləri Ednews-a Vətəndaşların Əmək Hüquqlarını Müdafiə Liqası İcraiyyə Komitəsinin sədri Sahib Məmmədov deyib. Onun sözlərinə görə, qiyməti bir milyon olan daşınmaz əmlakın (yaşayış evinin) sığortası ilə uçuq daxmanın sığorta qiyməti eynidir və sığorta hadisəsi zamanı ödəniş də eynidir.
"Bu sadəcə absurddur və yalnız pul qazanmaq üçündür. Bəziləri deyir ki, əmlak sığorta olunmayanda dövlət məcbur olur sığortaçı qismində çıxış etməyə. Onsuz da gələcəkdə də belə olacaq. Niyə? Əvvəla böyük dağıtılar zamanı onsuz da sığorta şirkəti bütün xərcləri qarşılaya bilməyəcək. Hətta dünyanın ən güclü sığorta şirkətləri zəlzələ, sunami və s. böyük təbii fəlakətlər nəticəsində baş vermiş dağıtıların əvəzini ödəyə bilmir. İkincisi Azərbaycanda az qala əmlakın 50%-i dövlət reyestrində daşınmaz əmlak kimi qeydə alınmayıb. Xüsusən rayonlarda yaşayış və kiçik qeyri-yaşayış sahələri var ki, rəsmən dövlət reyestrində əmlak kimi qeydə alınmayıb. Belə əmlakla bağlı hadisə baş verəndə kim ödəniş edəcək?
Sığorata şirkətləri yenə də kütləvi surətdə evlərə gəlib hədələyici elanlar yayırlar və iyunun 1-də İnzibati Xətalar Məcəlləsinin 469.1-ci maddəsinin tətbiq olunacağını bildirirlər. Bu o deməkdir ki, əgər fiziki şəxs evini icbari sığorta etdirməsə hər 20 gündən bir cərimə olunacaqlar. Bu bir ilə təxminən 550 manat edir. Nə baş verəcək? Yüzminlərlə insan ya pul olmadığına görə, ya məlumatsızlığa görə, ya hər hansı səbəbdə sğıorta etdirməyəcək evini. İllərlə belə davam etdikdə yüz milyonlarla cərimə toplanacaq. Axırda məcbur olub cərimələri ləğv edəcəklər. Çünki kütləvi surətdə əmlak üzərində hüquqların həyata keçirilə bilməməsi ciddi sosial problemə çevriləcək. Amma varlanmaq istəyən bir qrup bunu nəzərə almır. Hətta bəzi kateqoriya insanların sığortası dövlət hesabına həyata keçirlsə belə yenə yüzminlərlə sığortasız əmlak olacaq. Nəhayət ölkədəki əmlakın 50% rəsmi əmlak sayılmır. Bəlkə əvvəlcə onları rəsmiləşdirəsiz? Neçə illərdi bu məsələ həllini tapmayıb və tam da tapası deyil. Çünki, qanunsuz olaraq kənd təsərrüfatı təyinatlı torpaqlarda, kommunikasiyaların üstündə və altında, magistral yolların və kəmərlərin mühafizə sonasında, meşə fonduna daxil olunan torpaqlarda bütöv şəhər və qəsəbələr salınıb. Problem budur hörmətli qərarqəbul edənlər. Əvvəlcə bu problemi həll edin".
Oğuz