Artıq çimərlik mövsümü yaxınlaşır.
Hər il yeni çimərliklərin açıldığı bir vaxtda heç də hər kəs dəniz kənarında istirahət etmək hüququndan istifadə edə bilmir. Hicablı xanımlar üçün ayrıca çimərlik yerlərinin olmaması hələ də problem olaraq qalır.
Ümumiyyətlə, ölkədə halal turizmin vəziyyəti hansı yerdədir? Ölkə əhalisinin əksəriyətinin müsəlman olduğu və uzun illərdir islam ölkələrindən gələn turist axınının olduğunu nəzərə alsaq niyə Azərbaycanda halal konseptlə çalışan turizm obyekləri yox dərəcəsindədir?
Buna nə mane olur?
Məsələ ilə bağlı Ednews-a danışan turizm üzrə ekspert Əziz Şiriyevin sözlərinə görə, ölkəmizdə halal turizmə keçid o qədər də yüksək səviyyədə deyil:
“Bakının özündə halal konseptlə çalışan cəmi iki-üç hotel var. Halal konseptdə dənizkənarı istirahət obyeləri, çimərliklər isə demək olar ki, yox səviyyəsindədir. Novxanıda bir-iki belə yer var. Bu barədə düşünürük, amma hələki istədiyimiz effekti ala bilmirik. Gələcəkdə vəziyyət dəyişə bilər”.
Ə.Şiriyev qeyd edib ki, ərəb ölkələrindən gələn turistlərin əksəriyyətinin bahalı hotel, əyləncə, rayon turları axtarışında olması turizm sektorunda halal konseptə tələbatın o qədər də yüksək olmadığını deməyə əsas verir:
“Gələnlərin çoxu, demək olar ki, halal konsept axtarışında deyillər. Azərbaycana ərəb turistlərin axını 2015-ci ildən iraqlı qonaqlarla başlayıb. 29 may - 4 iyun tarixləri arası ölkəmizdə taekvando üzrə 26-cı dünya çempionatı keçirildi. Xaricdən kifayət qədər qonaq var idi. Koreya, Hindistan, Pakistan və Nepaldan qonaqlar çoxluq təşkil edirdi, təxminən 3-4 min nəfər. Düşünürəm ki, biz ailəvi turizmə üstünlük verməliyik. Konsept elə qurulmalıdır ki, tək bir istiqaməti əhatə etməsin, çoxşaxəli olsun”.
Ekspertin fikrincə, turizmin inkişaf etdiyi ərəfədə yalnız əyləncə məkanı kimi tanınmaq ölkəmizə heç də yaxşı imic qazandırmır:
“Biz əyləncəyə yer ayıranda, daha çox bunun təbliğatını aparanda ölkəmiz haqqında yaxşı imic formalaşdırmış olmuruq. Sosial şəbəkələrdə bunu görən ailəli insanlar artıq ölkəyə səfər etmək fikrindən daşınır. Düşünürlər ki, Bakı, Azərbaycan ancaq 5 ulduz hotellər, əyləncə mərkəzləri, klublardan ibarətdir. Halal və ailəvi turizmi önə çıxaran konsept üzərində işləmək lazımdır. Tələbat və gəlir az olduğu üçün turizm sektoru bu növü inkişaf etdirməkdə maraqlı deyil. Lakin biz bu sahədə nə qədər çalışdıq ki, tələbat görmədik?”
Məsələyə ilahiyyatçı Elşad Miri də münasibət bildirib. O qeyd edib ki, qonşu Turkiyə və bir sıra ərəb ölkələrində hicablı qadınlar üçün ayrıca çimərlik yerləri mövcuddur:
“Hicablı xanımların çimərliyə getməsində heç bir məhdudiyyət yoxdur. Onlar üçün nəzərdə tutulmuş xüsusi çimərlik geyimləri var. Ölkəmizdə də həmçinin satılır. Əlbəttə hicablılar üçün ayrıca çimərliklər olsa daha yaxşı olar. Üzgüçülük yerlərində, bəzi istirahət mərkəzlərində qadınlar və kişilər üçün giriş günləri ayrıdır. Çimərliklər üçün də belə variant təklif oluna bilər. Hər kəsin dənizdən, çimərlikdən istifadə hüququ təmin edilməlidir. Çimərliklər genişdir, bir hissəsini hicablı xanımlar üçün ayırmaq olar. Bunu nəzərə alıb müəyyən addımlar atılsa gözəl olar”.
Törə Zeynal
