Fevralın 7-də keçiriləcək prezident seçkilərinə az müddət qaldıqca seçkidən sonra gözlənən proseslərə maraq daha da artır. Xüsusilə də sosial-iqtisadi sahədə ölkədə hansı yeniliklərin olacağı böyük maraq doğurur. Bunların arasında manatın məzənnəsində, Tarif Şurası tərəfindən təyin edilən mal və xidmətlərin qiymətlərində hər hansı bir dəyişikliyin olub-olmayacağı xüsusi yer tutur.
Maraqlıdır, seçkilərdən sonra ölkənin sosial-iqtisadi həyatında hansı dəyişikliklərin baş verməsi mümkündür?
Bu barədə Ednews-a iqtisadçı-ekspert Günay Hüseynova bildirdi ki, əhalinin sosial iqtisadi vəziyyətinin yaxşılaşdırılması hər zaman prioritet məsələlərdən biri olub və bu istiqamətdə də dövlətimiz tərəfindən işlər görülür:
“Yeniliklər daha çox Qarabağ iqtisadi zonasında, xüsusi ilə də işgaldan azad edilmiş ərazilər üçün gözlənilir. Belə ki, xarici və yerli investorların cəlb edilməsi, vergi güzəştləri, köçürülən əhalinin sosial iqtisadi vəziyyətinin yaxşılaşdırılması yönündə nəzərdə tutulur. Manatın məzənnəsi ilə bağlı yayılan ajiotajlar isə öz əksini tapmayacaq. Müxtəlif dövrlərdə müəyyən kütlə arasında əhali arasında çaşqınlıq yaratmaq məqsədi ilə əsassız məlumat yayılır".
Ekspert hesab edir ki, manatın devalvasiyası hal-hazırki vəziyyət üçün gözlənilmir:
“Tarif Şurası tərəfindən mal və xidmətlərin qiymətində artım isə gözləniləndir. Xüsusi ilə xidmət sektorunda gözlənilir. Seçkilərdən sonrakı dönəmdə ərzaq və qeyri-ərzaq məhsullarında qiymət artımı, mart ayını xüsusi ilə qeyd etmək istəyərdim ki, gözlənilir. Bayram qabağı hər zaman olduğu kimi, yenə də artım müşahidəsi gözlənilir. Artan qiymətlər inflyasiya ilə paralel olmadığı üçün təbii ki, bu da yaşayış güzəranının aşağı düşməsinə səbəb olur”.
Oğuz