Azərbaycanda işsizlik səviyyəsi 5.5% olaraq qiymətləndirilib. Azərbaycanın bir çox rayonlarında insanlar işsizlikdən narazı olduqları üçün Bakı və digər iri şəhərlərdə məskunlaşmağa üstünlük verirlər.

Bəs Azərbaycanda işsizliyin sayının azaltmaq üçün hansı işlər görülməlidir?

Sosial ekspert Əhməd Qəşəmoğlunun fikrincə  aqrar sənayedə məşğulluğun azalması ilk növbədə Bakı şəhərinə təsir edir.

O, bu barədə Ednews-a danışarkən deyib.

“Azərbaycanda işsizliyin qarşısını asanlıqla almaq olar. Lakin, zavod, fabrik açmaq və ya yeni yollar çəkməklə buna nail olmaq mümkün olmayacaq. Ölkədə həm də əhalinin sayı sürətlə artır və bu artım işsizliklə balanslaşdırılmır. 
İlk növbədə elə etmək lazımdır ki, aqrar sənaye hərəkətə gəlsin. Kənd əhalisinin məğulluğu artsın. Rayonlardan iş üçün Bakıya insan axınının qarşısı alınmalıdır. Rayon əhalisi Bakıya iş fürsətləri üçün gəlsə də, bir çox hallarda hər hansı peşəyə yönəlməkdə çətinlik çəkirlər. 

Biz bunu anlamalıyıq ki, Bakı bir paytaxt şəhəri kimi sürətlə artan əhaliyə tab gətirə bilmir. Şəhər infrastrukturu əhali sayı ilə paralel genişlənə bilmir. Əhalinin məskunlaşma məsələsi həll edilsə, şəhərdə tıxaclar və digər problemlərin qarşısını almaq olar. Aqrar məşğulluğu artırmaq təkcə işsizliyi azaltmaq üçün yox, həm də Bakı şəhərini xilas etmək baxımından önəmlidir.

Mütləq və mütləq kənd təsərrüfatı ilə məşğul olan əhaliyə az faizli və ya faizsiz kreditlər verilməlidir. Kənd əhalisinin aqrar sənaye ilə məşğul olmasını təmin etmək üçün torpaq sahələri kirayə istifadəyə verilə bilər. Tədarük məntəqələrinin aktivləşdirilməsi üçün bu çox vacibdir. Aqrar sektor, bu gün, ölkədə işsizliyin qarşısında duran ən böyük problemdir. Əlavə olaraq, kənd təsərrüfatı məhsullarının Bakıda dəfələrlə yuxarı qiymətlərə satılması da bu addımların lazımi olduğunu sübut edir”.

Fərid