ABŞ Qiymətli Kağızlar və Birja Komissiyasının (SEC) rəhbəri Qari Gensler (Gary Gensler), vəzifə müddətinin sonlarına yaxın, kripto sektorundakı uyğunsuzluqlara diqqət çəkərək, görülən işlərdən qürur duyduğunu və hələ də vacib məsələlərin həll olunmasını gözlədiyini bildirib.

"EDnyus" xəbər verir ki, Gensler Bloomberg TV-yə verdiyi müsahibədə kriptovalyuta sahəsindəki fəaliyyətlərdən danışıb. O, keçmiş SEC rəhbəri Cey Kleytonun (Jay Clayton) dövründə başlanmış yanaşmanın davam etdirildiyini vurğulayıb.  

"Bu, uyğunsuzluq üzərində qurulmuş bir sahədir və biz, rəhbər Kleyton və başqalarının əvvəlki işlərini əsas götürərək mühüm nailiyyətlər əldə etdik," – deyə Gensler qeyd edib.  

Kriptovalyuta sektorundakı problemlər və tədbirlər  

Qari Gensler, kripto sektorunda bir çox “pis niyyətli aktyorların” olduğunu vurğulayaraq, SEC-in rəhbərliyi dövründə bu sahədə təxminən 100 tədbir həyata keçirdiyini qeyd edib. Bu tədbirlər, qurumun ümumi fəaliyyətlərinin 5%-ni təşkil edib.  

O, bir çox kripto aktivlərinin qiymətli kağız kimi qəbul edilməli olduğunu və bu şirkətlərin SEC-ə qeydiyyatdan keçməli olduğunu müdafiə edib. Gensler bu yanaşması ilə kripto sənayesi ilə gərgin münasibətləri davam etdirib.  

Keçmiş SEC rəhbəri Cey Kleyton isə 2017-2020-ci illərdə qurumu idarə edərkən, Kik və Ripple kimi mühüm məhkəmə işlərinə rəhbərlik etmişdi.  

Gensler həmçinin bazarları “Bitcoin və digər hər şey” olaraq iki hissəyə ayırdığını, bu bazarların əsasən duyğulara və təməl amillərə əsaslandığını bildirib:  

"Mən maliyyə bazarları ilə qırx ildən artıqdır məşğulam, amma bu qədər duyğulara əsaslanan və təməl amillərdən uzaq bir sahə görməmişəm. Sektordakı on minlərlə layihənin əksəriyyəti bu emosional və məntiqsiz atmosfer səbəbindən yox olacaq."