Azərbaycanın özəl sektoru beynəlxalq bazarlarda iştirakını genişləndirmək məqsədilə növbəti strateji addım atıb. “Black Caspian Logistics and Trading” şirkətlər qrupunun nümayəndə heyəti Oman Sultanlığına işgüzar səfər həyata keçirib. Səfər çərçivəsində ticarət, logistika və kənd təsərrüfatı sahələrində əməkdaşlıq imkanları müzakirə olunub.

Azərbaycanın Omandakı səfiri Rəşad İsmayılovun dəstəyi ilə baş tutan səfər ölkələrarası iqtisadi əlaqələrin möhkəmləndirilməsinə xidmət edən çoxsaylı görüş və müzakirələrlə yadda qalıb. Omanın dövlət strukturlarının və aparıcı özəl şirkətlərinin nümayəndələri ilə keçirilən görüşlərdə qarşılıqlı maraq doğuran sahələr üzrə konkret əməkdaşlıq istiqamətləri müəyyənləşdirilib.

Əsas diqqət mərkəzində Azərbaycan şirkəti “AZCHEMCO”nun texnologiyası ilə gübrə istehsalı müəssisələrinin Omanda tikilməsi məsələsi olub. Tərəflər həmçinin Azərbaycan və Mərkəzi Asiya ölkələrində istehsal olunan mineral və maye gübrələrin Hind okeanı regionundakı ölkələrə çatdırılması və bu məhsulların ticarətinin təşkili məsələlərini də müzakirə ediblər.

Digər mühüm mövzu isə kənd təsərrüfatı məhsullarının ixracı ilə bağlı olub. Görüşlər zamanı Azərbaycan, Gürcüstan, Türkiyə və Orta Asiya ölkələrindən meyvə, tərəvəz və digər ərzaq məhsullarının Oman və qonşu bazarlara ixrac imkanlarının artırılması məsələləri diqqət mərkəzinə alınıb.

Bu səfər, Azərbaycanın qeyri-neft sektorunun beynəlxalq iqtisadi sistemə inteqrasiyası, regional logistik imkanların artırılması və ərzaq təhlükəsizliyi sahəsində əməkdaşlıq baxımından mühüm strateji addım kimi qiymətləndirilə bilər. Omanın Hind okeanına çıxışı Azərbaycanın Orta Dəhliz strategiyası ilə uyğunluq təşkil edir və bu istiqamətdə reallaşdırılan təşəbbüslər regional iqtisadi dinamizmi artırmağa yönəlib.

Azərbaycanın özəl sektorunun bu cür beynəlxalq təşəbbüslərdə fəal iştirakı həm ölkənin ixrac imkanlarının genişləndirilməsinə, həm də Cənubi Qafqaz regionunun iqtisadi rolunun möhkəmləndirilməsinə xidmət edir.

Fatimə Şükürova // EDnews