Azərbaycan İqtisadi Əməkdaşlıq Təşkilatı (İƏT) daxilində əlaqələndirici rola malikdir.

“EDnews” xəbər verir ki , bu barədə  iqtisadiyyat üzrə fəlsəfə doktoru, siyasi şərhçi İlqar Vəlizadə danışıb.

Ekspert hesab edir ki, İƏT regional münasibətlər sistemində önəmli rol oynayan bir təşkilatdır:

“Təşkilatda Azərbaycan, Pakistan, Türkiyə, İran, Mərkəzi Asiya ölkələri təmsil olunur. İndiki mərhələdə bu üzvlərin bir-biri ilə münasibətləri çox vacibdir. Çünki dünyanın iqtisadi və siyasi səhnəsində mürəkkəb proseslər baş verir. Təkcə siyasi təhlükəsizliyin eroziyasını deyil, həm də iqtisadi münasibətlərin pozulmasını müşahidə edirik. Bu cür təşkilatların fəaliyyəti olduqları coğrafiyada həmin eroziyanın qarşısını almağa imkan yaradır”.

İ.Vəlizadə rəsmi Bakının İƏT ölkələri ilə sıx əməkdaşlıq əlaqələrinin olmasına diqqət çəkərək vurğulayıb ki, bunun hesabına Azərbaycan Mərkəzi Asiya gündəliyinə inteqrasiya olunur, həm də Türkiyə ilə Mərkəzi Asiya ölkələri arasında münasibətlərdə fəal iştirak edir:

“Digər tərəfdən qardaş Pakistanla çox yaxın münasibətlər qurulub. Hər iki ölkənin dövlət və hökumət başçılarının qarşılıqlı səfərləri də bundan xəbər verir. Bununla yanaşı, İƏT ölkəsi olan İranla münasibətlər də xüsusilə iqtisadi sahədə konstruktiv şəkildə qurulur. Bir neçə gün sonra İran Prezidenti Azərbaycana səfər edəcək. Bütün bunlar ondan xəbər verir ki, Azərbaycan, doğrudan da, İƏT daxilində əlaqələndirici rola malikdir”.

Müsahib qeyd edib ki, Azərbaycan İƏT daxilində daim konkret məsələlərin müzakirəsi və prioritetlərin yerinə yetirilməsi ilə məşğul olub:

“Bu xüsusda enerji, yol-nəqliyyat layihələrinin reallaşdırılması İƏT coğrafiyasında bütün ölkələri bir-birinə bağlı edir və iqtisadi əməkdaşlığın genişləndirilməsinə imkanlar yaradır. Onu da demək lazımdır ki, İƏT ölkələri qədim İpək Yolu üstündə yerləşiblər. Müasir dövrdə isə yeni İpək Yolunun çəkisi artır ki, nəticə etibarilə sözügedən ölkələrin rolu aktivləşir. Transkontinental yol infrastrukturunun qurulmasında onlar əhəmiyyətli yer tuturlar. Yəni İƏT ölkələrinin həm coğrafi potensialı, həm də zəngin resursları var”.

İ.Vəlizadənin sözlərinə görə, İqtisadi Əməkdaşlıq Təşkilatının 17-ci sammitinin Azərbaycanda keçirilməsi də təşkilatın fəaliyyəti ilə yanaşı, mövcud potensialın inkişafına mühüm töhfə verəcək.

Fatimə Mərdanlı // EDnews