Çinin Beynəlxalq Ay Tədqiqat Stansiyası (ILRS) Azərbaycanla kosmik sahədə əməkdaşlıq imkanlarını genişləndirə bilər.

“EDnews” xəbər verir ki , bunu Çin Milli Kosmos Administrasiyasının Dərin Kosmos Tədqiqatları üzrə İnnovasiya Mərkəzinin Beynəlxalq Əməkdaşlıq Mərkəzinin direktor müavini Lin Fey Bakıda keçirilən Kosmik Texnologiyalar Konfransında (STC2025) bildirib.

Onun sözlərinə görə, Çin 2004-cü ildən bəri Ay proqramı çərçivəsində orbitə çıxma, enmə və nümunələrin Yerə qaytarılması mərhələlərini əhatə edən 9 uğurlu missiya həyata keçirib: “Ötən il ilk dəfə Ayın görünməyən arxa tərəfindən nümunələr toplanaraq Yerə gətirilib. Hazırda biz Ayın tədqiqində yeni mərhələyə qədəm qoyuruq. Bu mərhələdə əsas məqsəd resurslardan istifadə və infrastruktur qurmaqla yanaşı, digər ölkələrlə elmi-texnoloji əməkdaşlıq imkanlarını genişləndirməkdir".

L.Fey qeyd edib ki, bu çərçivədə həyata keçiriləcək ən mühüm təşəbbüslərdən biri Beynəlxalq Ay Tədqiqat Stansiyası layihəsidir: “Stansiya Ay səthində və orbitində yerləşəcək və enerji təminatı, rabitə, elmi tədqiqatlar, resurs istifadəsi və texnoloji sınaqlar üçün imkanlar yaradacaq. Layihə beynəlxalq əməkdaşlığa açıqdır və gələcəkdə Azərbaycanın da bu təşəbbüsdə iştirak imkanları mövcuddur”.

O, əlavə edib ki, Azərbaycan kosmik sahədə ciddi addımlar atır: “Azərkosmos” vasitəsilə beynəlxalq tərəfdaşlıqlar qurulur, peyk missiyaları və texnoloji tədqiqatlar genişlənir. Bu kimi layihələr texnoloji təcrübə qazanmaq, elmi tədqiqatlarda iştirak etmək və strateji tərəfdaşlıqları gücləndirmək baxımından yeni imkanlar təqdim edir".

Fatimə Mərdanlı //EDnews