Azərbaycanın Rusiyadakı səfirliyində Ümummilli Lider Heydər Əliyevin anadan olmasının 102-ci ildönümünə həsr olunmuş xatirə gecəsi keçirilib.
“EDnews” xəbər verir ki, tədbir Azərbaycan diplomatik missiyası və Heydər Əliyev Fondunun Moskva nümayəndəliyi tərəfindən birgə təşkil edilib.
Gecədə diplomatik nümayəndəliklərin rəhbərləri, Rusiyanın tanınmış ictimai xadimləri, Heydər Əliyev Fondunun Rusiyadakı nümayəndəliyinin əməkdaşları, Rusiya Azərbaycanlı Gənclər Təşkilatının (RAGT) fəalları və Azərbaycan diasporunun görkəmli nümayəndələri iştirak ediblər.
Tədbir iştirakçıları Ümummilli Lider Heydər Əliyevin həyat yoluna və dövlət fəaliyyətinə həsr olunmuş fotosərgi, həmçinin böyük liderə həsr olunmuş kitablarla tanış olublar.
Gecəni açan səfir Rəhman Mustafayev Heydər Əliyevin Azərbaycan tarixindəki görkəmli rolu və müasir Azərbaycan dövlətçiliyinin formalaşmasına verdiyi böyük töhfələrdən danışıb.
Diplomat Heydər Əliyevlə XX əsrin tanınmış tarixi şəxsiyyətləri - Almaniyada Konrad Adenauer, Türkiyədə Mustafa Kamal Atatürk və Fransada Şarl de Qoll arasında paralellər aparıb. Heydər Əliyevin və de Qollun taleyini müqayisə edərək o deyib: "Bu iki şəxsiyyət arasında çox oxşarlıqlar var. Hər ikisi ölkə ağır böhran vəziyyətində olarkən hakimiyyətə qayıdıblar". Səfir 1993-cü ildə Azərbaycanın vətəndaş müharibəsi astanasında, işğal olunmuş ərazilərlə, yüz minlərlə qaçqınla, hakimiyyət iflici və dərin iqtisadi böhranla nə qədər ağır vəziyyətdə olduğunu xatırladıb. "Bu, demək olar ki, vətəndaş müharibəsi astanasında olan Azərbaycan idi. Ərazisinin böyük hissəsi işğal altında idi".
Diplomat xüsusi olaraq rəmzi bir məqam üzərində dayanaraq bildirib ki, 9 may tarixində Qırmızı meydanda keçirilən Qələbə Paradı zamanı bir çox azərbaycanlılar kimi o da qürur hissi keçirib: "Qızıl meydanda hərbi qulluqçularımızın Azərbaycan bayrağı ilə təntənəli keçidini izləyərkən, əlbəttə, tamamilə fərqli bir Azərbaycanı xatırladım... Və başa düşdüm ki, əgər Heydər Əliyev olmasaydı, hərbi qulluqçularımızın bu təntənəli yürüşü də bəlkə olmazdı".
Xarici siyasətdən danışarkən səfir xüsusilə vurğulayıb ki, Heydər Əliyevin qərb liderlərinin malik olduğu geosiyasi "çətiri" yox idi. "Marşall planı yox idi. Xaricdən maliyyə, iqtisadi, siyasi və geosiyasi dəstək yox idi. Yəni bu çətiri Heydər Əliyev özü, öz əlləri ilə yaradırdı", - deyə diplomat qeyd edib. O əlavə edib ki, böyük liderin həyata keçirdiyi balans siyasəti və enerji layihələri strateji tərəfdaşlıqlar üçün təməl olub: "Və buna görə də, əlbəttə, biz deyirik ki, məhz o, bu gün tanıdığımız Azərbaycanın - sabit, hörmət edilən və strateji cəhətdən müstəqil dövlətin əsaslarını qoyub".
RF Xarici İşlər Nazirinin müavini Mixail Qaluzin öz çıxışında Heydər Əliyevin Sovet İttifaqı və müstəqil Azərbaycan tarixindəki görkəmli rolunu vurğulayıb.
"Heydər Əliyeviçin xatirəsi qəlbimizdə ehtiramla qorunur və o, ümumi tarixi keçmişimizin parlaq rəmzidir", - deyə diplomat qeyd edib. O xatırladıb ki, 1982-1986-cı illərdə SSRİ Nazirlər Soveti sədrinin birinci müavini vəzifəsində Heydər Əliyev maşınqayırmadan və ticarətdən tutmuş mədəniyyət və nəqliyyata qədər 12-dən çox nazirliyin işini əlaqələndirirdi. Onun şəxsi kuratorluğu altında Baykal-Amur magistralının tikintisi - əhəmiyyəti bu gün də aktual olan ən böyük infrastruktur layihəsi həyata keçirilirdi.
Böyük Vətən müharibəsində Qələbənin 80 illiyi kontekstində çıxış edən Rusiya XİN başçısının müavini 9 mayda keçirilən paradda Azərbaycan hərbçilərinin iştirakının rəmzi məna daşıdığını qeyd edib. "Bu, qəhrəmanlıq ənənələrinin varisliyi və münasibətlərimizin müttəfiqlik xarakterini nümayiş etdirən daha bir mühüm yaddaş estafetəsidir", - deyə o vurğulayıb.
Dövlətlərarası Aviasiya Şurasının prezidenti Tatyana Anodina, sənətşünas Zelfira Trequlova, MGİMO-nun inkişaf üzrə prorektoru, rektor aparatının rəhbəri Artyom Malgin, Sosialist Əməyi Qəhrəmanı, BAM işçisi Leonid Kazakov və başqaları öz xatirələrini bölüşüblər.
Gecə çərçivəsində Rusiya elmi və dini qurumlarının rəhbərləri adından müraciətlər də oxunub. Rusiya Müsəlmanları Ruhani İdarəsinin sədr müavini Damir Muxetdinov Rusiya Müsəlmanları Ruhani İdarəsinin sədri Ravil Qaynutdinin adından müraciət oxuyub. Rusiya Elmlər Akademiyasının vitse-prezidenti Stepan Kalmıkov REA prezidenti Gennadi Krasnikovun məktubunu çatdırıb.
Fatimə Mərdanlı //EDnews
