Ukraynanın xarici işlər naziri Andrey Sibiqa Azərbaycana səfərinin yekunları ilə bağlı sosial media hesabında mühüm açıqlamalarla çıxış edib. O, Azərbaycanı Ukrayna üçün “son dərəcə vacib strateji tərəfdaş” adlandırıb və iki ölkə arasında münasibətlərin yeni mərhələyə keçməsinin vaxtının çatdığını vurğulayıb.
Sibiqa bildirib ki, Azərbaycanla münasibətlər yalnız enerji və ticarət sahəsində deyil, bütün strateji istiqamətlərdə dərinləşdirilməlidir. Xarici işlər naziri Ceyhun Bayramov və iqtisadiyyat naziri Mikayıl Cabbarovla keçirilən görüşlərdə əsas müzakirə mövzuları enerji, ticarət, investisiya və regional əməkdaşlıq olub.
Nazir, Azərbaycanın Avropanın enerji təhlükəsizliyində oynadığı rolu yüksək qiymətləndirərək qeyd edib:
“Avropa İttifaqı kimi, biz də Azərbaycanı Avropanın enerji təhlükəsizliyinə əsas töhfə verən ölkə kimi görürük. Ukrayna isə öz tranzit təcrübəsi və Avropadakı ən böyük qaz anbarları vasitəsilə bu prosesə töhfə verməyə tam hazırdır. Ukrayna Azərbaycan üçün Avropada əsas enerji qovşağına çevrilə bilər.”
Bu bəyanat, həm enerji təhlükəsizliyi, həm də strateji infrastruktur baxımından Ukrayna və Azərbaycanın Avropa bazarına birgə çıxışı üçün yeni imkanlar yarada bilər.
Nazir onu da əlavə edib ki, yaxın vaxtlarda İqtisadi Əməkdaşlıq üzrə Birgə Hökumətlərarası Komissiyanın iclası keçiriləcək və bu, münasibətlərin institusional əsasda möhkəmləndirilməsinə xidmət edəcək.
Sonda Andrey Sibiqa 28 May – Azərbaycanın Müstəqillik Günü münasibətilə Ukrayna rəhbərliyinin təbrikini Azərbaycan rəhbərliyinə çatdırdığını qeyd edib.
Bu açıqlama, regionda baş verən geosiyasi dəyişikliklər fonunda Azərbaycan-Ukrayna münasibətlərinin daha da gücləndiyini göstərir və enerji əməkdaşlığının gələcək strateji gündəlikdə əsas mövqedə olacağını təsdiqləyir.
Fatimə Şükürova // EDnews
