Azərbaycan Respublikası Suriyada yaşayan müharibədən zərər çəkmiş ailələrə dəstəyini davam etdirir. Qurban bayramı münasibətilə 2025-ci ilin iyun ayının 7-dən 8-dək Azərbaycan Respublikasının Suriya Ərəb Respublikasındakı səfirliyinin təşəbbüsü və Azərbaycan Beynəlxalq İnkişaf Agentliyinin (AİDA) dəstəyi ilə genişmiqyaslı xeyriyyə aksiyası həyata keçirilib.
“Azərbaycan xalqından qardaş Suriya xalqına ən səmimi salam” şüarı ilə keçirilən aksiyada Dəməşqin kəndləri, eləcə də Homs və ətraf rayonlardakı müharibədən zərər çəkmiş 320 ailəyə qurban əti paylanıb. Kampaniya yerli "Həyat Fondu", “Sawaidul İhsan” (Xeyriyyə Əlləri) və “Bəsmət Həyat” (Həyat Təbəssümü) könüllü təşkilatlarının iştirakı ilə geniş miqyas alıb.
Aksiyanın ilk günü Qərbi və Şərqi Quta bölgələrindəki ərəb, türkmən, çərkəz və ələvi ailələrə yardım çatdırılıb. İkinci gün isə Homs və yaxın ərazilərdə paylanma davam etdirilib. Ən çox yardım alanlar arasında uzun illərdir davam edən vətəndaş müharibəsində həyat yoldaşlarını itirmiş, çoxuşaqlı dul analar olub.
Ümumilikdə iki günlük kampaniya çərçivəsində 1500-ə yaxın insan yardım əldə edib. Ailələr Azərbaycan xalqına və dövlətinə dərin minnətdarlıqlarını bildirərək, bu nəcib addımın böyük mənəvi əhəmiyyət daşıdığını vurğulayıblar.
Azərbaycanın Suriyaya humanitar yardımı bu aksiyayla məhdudlaşmır. Prezident İlham Əliyevin müvafiq göstərişlərinə əsasən, ölkəmiz humanitar dəstəyi davamlı şəkildə həyata keçirir. 2024-cü ilin sonunda Azərbaycan tərəfindən Suriyaya 200 ton humanitar yardım göndərilmiş, 2025-ci ilin mart ayında isə Dəməşqdə 1000 kimsəsiz uşaq üçün iftar süfrəsi təşkil olunmuşdu.
Azərbaycanın bu humanitar missiyası yalnız yardım deyil, həm də dostluq və qardaşlıq münasibətlərinin daha da möhkəmlənməsi istiqamətində atılmış vacib addımdır.
Fatimə Şükürova // EDnews
