Yanvarın 18-də Azərbaycanda COVID-19-a qarşı vaksinasiya prosesinə səhiyyə işçilərinin peyvəndlənməsi ilə start verilib. Nazirlər Kabinetinin 2021-ci il 16 yanvar tarixli Sərəncamı ilə “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası” təsdiq edilib. Strategiyaya uyğun olaraq vaksinasiyanın birinci mərhələsində səhiyyə işçiləri peyvənd olunub.
Daha sonra orta məktəb müəllimləri, eləcə də, strateji sahələrdə işləyənlər (məsələn, polis əməkdaşları) vaksinasiya prosesinə cəlb olunublar.
Ölkədə vaksinasiya mərhələli qaydada keçirilir: Fevralın 2-dən 65 yaşdan yuxarı, fevralın 17-dən 50-dən yaşdan yuxarı şəxslərin vaksinasiyasına başlanılıb. Daha sonra 40 yaşdan yuxarı şəxslərin vaksin edilməsinə icazə verilib. Mayın 10-dan isə 18 yaşdan yuxarı bütün şəxslər vaksinasiya oluna bilərlər.
TƏBİB 2020-ci ilin sonunda Azərbaycanda vaksinasiya ilə bağlı birinci mərhələdə əhalinin 10 faizinə peyvənd vurulacağını, ikinci mərhələdə isə peyvəndlənmənin respublikanın daha çox hissəsini əhatə edəcəyinibildirmişdi. Vaksinasiya proseduru çərçivəsində peyvəndin birinci dozası vurulduqdan 28 gün sonra ikinci doza da vurulmalıdır.
Covid-19 koronavirusuna qarşı vaksinasiya dövlət hesabına aparılır və könüllüdür.
Qeyd edək ki, hazırda bütün dünyada aktiv şəkildə peyvəndləmə prosesi aparılır. İsrail, Böyük Britaniya və bəzi digər ölkələr vaksinləşdirmə prosesində ciddi uğur əldə ediblər. Mütəxəssislər də bildirirlər ki, koronovirus pandemiyasına ancaq kütləvi vaksinləşmə prosesi ilə qalib gəlmək olar. Lakin bunlara baxmayaraq insanlar arasında vaksinasiyaya qarşı inamsızlıq davam edir.
Sözsüz ki, ölkəmizdə də vaksinasiya prosesi birmənalı qarşılanmadı, vaksinin faydalı olduğunu inanalar da oldu, bunun həyatımızı məhv edəcəyini söyləyənlər də. Hətta pandemiyanı “siyasi oyun” adlandıranlar belə, var. Bəs görəsən bu fikirlərin yaranmasının səbəbi nədir?
Eurasia Dairy mövzu ilə bağlı tibb eksperti, professor Adil Qeybullanın fikirlərini öyrənib.
.jpg)
A. Qeybulla bildirib ki, vaksinasiya prosesində insanların inamsızlığının kökündə təbliğatın və maarifləndirmə işinin yetərsizliyi durur: “Ümumiyyətlə vaksin tərəddüdü bütün dünyada mövcuddur. Ümumdünya Səhiyyə Təşkilatı 2019-cu ildə insan sağlamlığına təhdid edən faktorlardan biri kimi, vaksin tərəddüdünü göstərmişdi. Amma bu, kökündən yanlış və zərərli yanaşmadır. Çünki məhz vaksinasiya nəticəsində xeyli uğurlar əldə edilib. Bir çox geniş yayılmış viruslar məhz vaksinasiya sayəsində sona çatıb. Ona görə də bu prosesin böyük əhəmiyyəti var”.
Həkim həmçinin onu da qeyd edib ki, maarifləndirmə işi üçün mütəxəssislər, psixoloqlar, həkimlər, ümumiyyətlə cəmiyyətdə nüfuzu olan insanların xidmətindən istifadə etmək lazımdır.
“Media bütün gücünü səfərbər etməlidir. Çünki pandemiya dövrüdür və bununla mübarizə hər bir şəxsin işidir. Əlbəttə ki, əhaliyə düzgün informasiyanın çatdırılması, onların düzgün maarifləndirilməsinə səbəb olur. Vaksinasiya prosesinin əsas hədəfi yoluxanlarla birlikdə insanları kollektiv immunitetə çatdırmaq və pandemiyanı sona çatdırmaqdır. Burda əsas məsələ 75%-ə yaxın nəticə əldə edilməsidir. İstər yoluxanlarda, istərsə də vaksinasiya olunanlarda immunitet yaranarsa, o zaman pandemiya tamamilə sona çatar. Azərbaycana gətirilən vaksinlərdən istər Çin, istərsə də başqa vaksinlərdən istifadə edirik və inanırıq ki yaxın zaman da nəticəsini görəcəyik” ” – deyə ekspert əlavə edib.
Seyranə Quliyeva
