Son vaxtlar Bakı və ətraf rayonlarda xüsusi sahibkarlar tərəfindən xeyli tibb kursları açılıb. Bir müddət davam edən dərslərdən sonra kursda iştirak edənlərə serifikat təqdim olunur. Sertifikatını əlinə almış kurs tələbələri bu sahənin müəssisələrində fəaliyyət göstərməyə başlayırlar. Belə sertifikatla işləyənlərin sayı gündən-günə artır. Bəs sertifikatla tibb işçisi kimi işləmək nə dərəcədə doğrudur?
Həkim İlqar Hüseynli Ednews-a açıqlamasında bildirib ki, Azərbaycan Respublikasının bütün ərazisində tibb xidmətlərini yerinə yetirmək üçün kifayət qədər kadr çatışmazlığı var. Bizim problemimiz də buradan yaranır.
“Azərbaycan Respublikası Səhiyyə Nazirliyi və Azərbaycan Respublikası Təhsil Nazirliyi tərəfindən akkreditasiya keçmiş tibb universitetləri və eyni zamanda dövlət tərəfindən həmin akkreditasiyaya sahib olan bir neçə tibb kolleclərinin diplomlarını almış hər bir şəxsin çalışmaq izni var. Həmçinin Səhiyyə Nazirliyi tərəfindən xüsusi qaydada 5 ildən bir öz ixtisası üzrə sertifikasiya keçmiş tibb işçiləri dövlət və özəl səhiyyə müəssisələrində fəaliyyətlərinə qanunla icazə verilir”.
İ.Hüseynli həmçinin onu da qeyd etdi ki, tibb müəssisələrində yalnız birbaşa xəstələrə xidmət göstərən tibb işçiləri ilə yanaşı digər xidmətlər həyata keçirən şəxslər də var.
“Sanitarlar, müxtəlif palata şəraitində xidmət göstərən xadimələr yaxşı olar ki, həmin tibb kurslarını bitirmiş şəxslər olsun. Qeyd edim ki, 5 il müddətini başa vurub, nəzəri cəhətdən sertifikasiyadan keçmirsə, baxmayaraq ki, tibb universitetini, tibb kollecini bitiribsə də yenə o şəxslərin işləmək hüququ yoxdur”.
Həkim Adil Qeybulla isə lokonik fikirlər bildirib. O, açıqlamasında bildirdi ki, bu kimi kurslara inanmaq olmaz.
“Bu kursları bitirən insanlar xəstələrə ilkin yardım göstərə bilərlər. Amma tibb universitetinin və ya texnikumunun diplomu olmadan bu vəzifəni yerinə yetirmək olmaz. Çünki tibb işçiləri üçün nəzərdə tutulan proqram var ki, onu tələbə mükəmməl qavramalıdır. Bunun üçün isə tibb ixtisasına yiyələnmək lazımdır”.
Aynurə Mustafayeva
