Xəbər verdiyimiz kimi, Türkiyədən fərdi istifadə üçün dərmanların gətirilməsinə qadağa qoyulması barədə iddialar səsləndirilib. Belə ki, bu barədə sosial şəbəkə istifadəçilərdən biri məlumat verib. O, qeyd edib ki, “İldə ən az on dəfə Azərbaycana “ptt” ilə dərman göndərirdim. Bu il ilk dəfə poçtda mənə bildirildi ki, artıq Azərbaycana dərman göndərilmir”.
Müştəriyə səbəb kimi artıq göndərilən dərmanların Azərbaycan tərəfindən müsadirə edilməsi olub.
Məsələ ilə bağlı Ednews-a Milli Məclisin Səhiyyə komitəsinin sədr müavini Musa Quliyev bildirib ki, dərman poçtla gələ bilməz. Hazırda həm Azərbaycanda, həm də qonşu dövlətlərdə dərman problemi bu saat çox ciddi mövzudur. Eyni zamanda dünyada koronovirus pandemiyasından sonra dərman qıtlığı yaşanır.
“Bu çox ciddi faktdır. Digər tərəfdən Ukrayna-Rusiya müharibəsinin başlanması, bizim də ən çox dərman idxal etdiyimiz, ucuz dərman aldığımız Rusiya və Ukrayna bazarının da demək olar bağlanmasına gətirib çıxardı. Bu mənada ölkədə dərmanların qıtlığı yaranıb. Həm də qiymətlər xeyli artıb. Bununla bağlı Milli Məclisdə, mətbuatda da təkliflərimi irəli sürmüşəm. O təkliflərdən biri Türkiyəni Azərbaycanın dərman sənayəsinə yaxşınlaşdırmaq, birgə fəaliyyətlə məşğul olmaqdır. Avropa dövlətlərində qeydiyyatda olan və işlənən dərmanlar bizdə avtomatik olaraq qeydiyyata alınmalıdır. Qeydiyyat prosedurunun bir iştirakçısı da dərman istehsalçılarıdır. Əhalisi az olan ölkələrdə həmin istehsalçılar belə çətin prosedurlara görə maraqlı deyil. Qeydiyyatda tanıma rejimi Türkiyədə tətbiq edilir. Bu, bizdə də tətbiq edilməlidir. Biz qardaş Türkiyədə qeydiyyatdan keçən dərmanları avtomatik qeydiyyata almalıyıq. "Dərman vasitələri haqqında" qanunda dəyişikliklər etməliyik. Bu təklif mənə elə gəlir ki, dərman məsələsini həll edə bilər. İlk növbədə qiymətlər aşağı düşər, ikinci növbədə çox çeşidlə dərman əldə edə bilərik, üçüncü və ən əsası vətəndaşlarımızın dərmana əl çatanlığı, kefiyyətin qorunması təmin oluna bilər. Türkiyə dərmanları bu gün dünya bazarında ən əlçatan qiymətə olan və keyfiyyətli dərmanlardan sayılır”.
Deputat qeyd etdi ki, Gömrük və poçt işçilərini də qınaya bilmərəm, qanun bunu qadağa edir. Hər kəs dərmanı yalnız fərdi istifadəsi üçün qeydiyyatdan keçməyən dərmanları gətirə bilər. O da ki, hər kəs dərman arxasınca xarici ölkəyə gedən deyil.
“Bunun həlli yolunda düşünmək lazımdır. Problem yoxdur deyib başımızı aşağı salmaqla da olmur. Azərbaycanda dərmanları 80-85 faizini 4-5 böyük şirkət gətirir. Dörd şirkətin olmağı istər-istəməz qeyri-təbii monopoliyanın yaranmasına gətirib çıxarır. Deməli, burda istənilən halda şirkətlər aralarında danışıb qiyməti istədikləri şəkildə qoya bilirlər.
Dünyada davam edən maliyyə və iqtisadi böhran şəratində bu istiqamətdə yeni düşüncələr ortaya qoyulmalıdır. O cümlədən də söylədiyim Türkiyə məsələsi təkflidi faydalı addımlardan olardı. Hər halda Səhiyyə Nazirliyi, TƏBİB konkret olaraq insanlara söz deməlidirlər, məlumat verməlidirlər. Bəzi hallarda həkimlərimiz açıq şəkildə bizə deyirlər ki, Türkiyəyə yolunuz düşəndə bizə də dərman alın. Bu o deməkdir ki, Azərbaycanda dərmanın keyfiyyətinə inam yoxdur. Bu çox təhlükəlidir. İnsan inanmalıdır ki, aldığı ərzaq da, dərman da keyfiyyətlidir”.
Oğuz
