Günümüzdə insanlar sağlamlıqlarına qarşı laqeyd qalırlar. Sonradan fəsadlar çıxanda gec olur. Müasir insanlar zamanın sürətinə tab gətirə bilmir, müəyyən sağlamlıq problemləri yaşayırlar.
Mövzu ilə bağlı Ednews-a danışan terapvet Rasif Bağırov bildirdi ki, azərbaycanlılar heç də öz sağlamalıqlarına qarşı laqeyd deyillər:
“Əsas maaliyyə problemidir. Gəlirləri normal olanda təbii ki, onlar həkimə getməyi üstün tuturlar. Belə desək bu sağlamlıq məsələsində heç kəs öz sağlamlığına laqeyd deyil. Xəstələrlə müəyyən ünsiyyətdə olduqda görürsən ki, insanlar xəstəlik adı gələndə çox qorxu keçirdirlər. O saat gözlərinin qabağına ölüm gəlir, xəstəliyi aşkar edənə qədər əhval-ruhiyyələri düşür, lazımi səviyyədə olmur. Ona görə də yaxşı əhval-ruhiyyədə olmaq üçün xəstəliyin ağır və ya yüngül olmasını mütləq araşdırmalıdırlar. Onlar ən xırda məsələlərdən də ötrü mütləq həkimə müraciət edirlər, araşdırmağa çalışırlar. Elə ki, iqtisadi vəziyyət çətinləşir insan bilmir ki, həkimə getsin yoxsa evə nəsə alıb aparsın. Belə bir seçim qarşısında qalanda təbii ki, evə nəsə aparmağı üstün tuturlar nəinki həkimə getməyi”.
Terapvetin sözlərinə görə, bəzi insanlar var hansı ki, həkimə getmək istəmirlər orada iki variant var:
“Birincisi qorxular ki, həkim bir xəstəlik adı deyər, o da həmin gündən başlayacaq əsəb gərginliyi keçməyə, bütün gün xəstəliyi barədə düşünəcək. Və ağır həyat başlıyacaq. Digəri isə ya özlərinin pulu olmur ya da ki başqasını aparıb xərcə salmaq istəmir. Ona görə özlərini laqeyd kimi göstərirlər. Mən özünə laqeyd yanaşan bir xəstəyə rast gəlmədim.”
Tanınmış həkim, professor Adil Qeybulla da mövzu ilə bağlı fikirlərini qeyd etdi. Onun sözlərinə görə, Qərb təbabətinin standartları hər tərəfli mənimsənilməlidir ki, bu işlər bir vərdişə çevrilsin:
“İndi “icbari tibbi sığorta” tətbiq olunub, insanlar artıq uzun müddət əhəmiyyət vermədikləri məsələləri belə yoxladırlar. Digər tərəfdən Sovet dövründə bir sistem var idi. Belə ki, mütəmadi olaraq məsələn, vərəmin, infeksion xəstəliklərin, zonozların və digər infeksiyaların aşkar olunması üçün müəyyən işlər gedirdi”.
Həmçinin o, “icbari tibbi sığorta”nın geniş tətbiq olunmasından sonra, “chek up” müayinələr öz yerinə oturduqdan sonra insanların müayinəsinin artıq bəzi sahələrdə həm planlı, həm də məcburi xarakter alacağını və bu problemlərin qaydaya düşəcəyini bildirib.
Vəfa Ustayeva