Türkiyənin Aksaray şəhərində arıqlamaq üçün tez-tez bitki çayları içən Büşra adlı 24 yaşlı qadın qaraciyər çatışmazlığından komaya düşüb. Qadın qaraciyər nəqli sayəsində həyata qayıda bilib.
Bu barədə Oxu.Az "Haber Global"a istinadən xəbər verir.
Məlumata görə, gündəlik bəzən dörd stəkana qədər bitki çayı içən gənc qadın eyni müddət ərzində ağrıkəsici dərmanlardan da istifadə etdiyi zaman bədənində müxtəlif simptomlar ortaya çıxmağa başlayıb. Büşranın əllərində qırmızı ləkələr əmələ gəlib, oynaq ağrıları artıb, huşsuzluq kimi narahatlıqlar ortaya çıxıb.
Aksarayda edilən ilkin müdaxilədən sonra vəziyyəti pisləşən qadın qaraciyər koması ilkin diaqnozu ilə Antalya Təhsil və Araşdırma Xəstəxanası Orqan Nəqli Mərkəzinə göndərilib. Burada onun qaraciyər fermentlərinin çox yüksək olmadığı, lakin sarılıq göstəricilərinin əhəmiyyətli dərəcədə artdığı müəyyən edilib. Canlı donor tapılmadığı üçün Büşra təcili orqan gözləmə siyahısına salınıb. Təxminən 24 saat ərzində uyğun donor tapılıb və qaraciyər transplantasiyası həyata keçirilib. Əməliyyatdan sonra reanimasiyada müalicə alan Büşranın qaraciyər funksiyaları normallaşıb. O, əməliyyatın üçüncü həftəsində evə buraxılıb.
"Yaşıl çay ilə cökə çayından istifadə edirdim. Xəstələnəndə cökə çayı içirdim, şişkinlik hiss edəndə yaşıl çaya üstünlük verirdim. Arıqlamaq üçün paket çaylardan istifadə edirdim. Bəzən bir stəkan, bəzən isə gündə dörd dəfə içirdim. Adətən hazır, marketdən aldığım çaylara üstünlük verirdim. İnsanlar hələ də bu məhsullardan istifadə edir. Mən çox pis nəticə ilə üzləşdim, artıq heç kimə tövsiyə etmirəm. Həkim məsləhəti olmadan qəti şəkildə istifadə edilməməlidir", - deyə Büşra bildirib.
Türkiyəli həkim, professor Arif Aslaner bu hadisədən mühüm dərs çıxarılmasının vacibliyini vurğulayıb.
"Xəstə bir az artıq çəkisi olduğu üçün və ya sosial mediada izlədiyi diyetoloqların məsləhəti ilə müxtəlif bitki çayları və əlavələrdən istifadə edib. Zərərsiz görünən bu məhsullar qaraciyərinə ciddi ziyan vurub. Bu cür məhsullardan istifadə etməzdən əvvəl mütləq mütəxəssislə məsləhətləşmək lazımdır. Sosial mediada yayılan bitki çayları və arıqlamaq üçün olan məhsullar ciddi sağlamlıq problemlərinə yol aça bilir. Bu məhsullardan istifadə etməzdən əvvəl insanlar iki dəfə düşünməlidirlər", - deyə o qeyd edib.
