Hər bir millətin özünə xas tarixi, mədəniyyəti, milli-mənəvi, dini dəyərlərinə söykənən fərqli toy adət-ənənələri var. Elə bu səbəbdən də hər bir xalqın özünəməxsus, maraqlı bəzən təəccübləndirən toy qaydaları mövcuddur.
Mövzunun cəmiyyət arasında geniş maraq doğurduğunu nəzərə alaraq, Ednews oxucuları üçün mütəmadi olaraq dünya toy adət-ənənələri haqqında maraqlı faktları təqdim edəcək.
Ednews “Onlarda toylar” rubrikasını təqdim edir. Bu dəfə isə İordaniya Krallığında keçirilən toy adət-ənənələrindən söz açacağıq.
İordaniyalılar çox qonaqpərvər olduqlarından onların toyları olduqca təmtaraqlı keçir. Onlar üçün toy sadəcə qonaqpərvərliyin simvolu deyil, həmçinin iki ailənin birləşməsi deməkdir.
İrodaniyada toylar üç hissədən ibarətdir. İlk öncə nişana qədər oğlanın anası tanışlıq üçün gəlinin ailəsəni qonaq gedir. Daha sonra onlar oğlan adından elçilik edirlər. Adətə görə, elçiliyə qədər oğlan qızın razılığını almış olur. Əgər ikitərəfli razılıq olarsa, hər iki tərəfdən qohum-əqrəba toplaşaraq, elçiliyi rəsmiləşdirmək üçün Fatihə (Quranın ilk surəsi) oxunur.
Növbəti hissə isə nişana hazırlıq olur. Oğlan evinin ağsaqqalları gəlin evinə xonça gətirirək, şirniyyat süfrəsi açılır. Nişan ərəfəsində ailələr daha da yaxından tanış olur.
Adətə görə, İordaniyada bir həftəlik toy şənlikləri çərşənbə axşamından başlayır. Toydan əvvəl gəlin üçün xına gecəsi keçirilir.Çərşənbə günü oğlanın ailəsi gəlinin evinə yollanaraq, gəlinin əlinə yarpaqlardan dəmlənmiş xınadan naxışlar çəkir.
Süfrəyə gələn təamalar, bölgələrə görə fərqlənir. Məsələn “Əqabə” adlı dəniz limanında tuna balığından və İrbid şəhərində qaraciyər kimi yeməklər süfrəyə qoyulur.
Cümə axşamında isə oğlan tərəf bəy üçün toplaşaraq, onun üçün “bəyin ruh gecəsi” məclisini keçirirlər.
Sonda isə əsas sayılan toy məclisinə sıra çatır. Bəy ailəsi ilə birgə avtomobil karvanı ilə gəlini ata evindən götürmək üçün yollanır. Əgər qulağınıza silah səsləri eşidilərsə, qəti təlaşa düşməyin. Çünki İordaniyada bu çox normal hal sayılır. Bu, mərasimin təntənəli keçdiyini ifadə edən bir ənənədir. Bundan əlavə, bəylə gəlin toy mərasiminə avtomobillərin səs siqnalı sədasıyla gətirilir.
Toylar daha çox kirayələnmiş mehmanxanalarda keçirilir. Bəylə gəlin toy dəhlizinə vağzalı sədaları altında daxil olurlar.
İordaniya toylarını rəqssiz təsəvvür etmək olmaz. Əgər oynamayan bir nəfər qonaq qalsa belə, rəqs axınına qoşularaq, canlı "dabka" rəqsində iştirak edirlər.
Quzu və düyüdən ibarət “Mansaf” adlı bir yemək toy mərasimində təqdim edilir. Bu təam bəzən mehmanxanada keçirilən toyda süfrəyə verilir, bəzən isə ənənəvi toylarda nahar yeməyi olaraq, cümə günü süfrəyə təqdim edilir.
Son illərdə bir çox insanlar ənənəvi toylardan imtina edərək, daha müasir toylar keçirməyə üstünlük verirlər, lakin əyalət və kəndlərdə köhnə adətlər hələ də qüvvədə qalmaqdadır. Bundan əlavə, İordaniyanın hər əyalətində toy adət-ənənələri yemək və ya geyim baxımından bir qədər fərqlənir.