Bədən dili bizə nə öyrədir? - Ağrılarınızdan bu nöqtələrlə qurtulun - ednews.net

19 Avqust, Cümə

(+994 50) 229-39-11

Bədən dili bizə nə öyrədir? - Ağrılarınızdan bu nöqtələrlə qurtulun

Maraqlı A- A A+

Müasir həyatın gətirdiyi yorğunluq, stress və narahatlıq kimi faktorlar vaxtaşırı sağlamlıqlarına mənfi təsir göstərə biləcək səviyyəyə gələ bilir. Yorğun bir gündən, narahat saatlardan sonra qəfil başlayan baş, bel, göz və ya mədə ağrısı kimi problemlərlə qarşılaşmaq insanı daha da stresə salır. Zehni amillərlə yanaşı, fiziki faktorlar da bədəninizin müəyyən bir hissəsində müvəqqəti ağrı hiss etməyinizə səbəb ola bilər. Belə bir vəziyyətdə həblərdən kömək almaq əvəzinə ağrı kəsici nöqtələri bilməklə tətbiq edə biləcəyiniz başqa bir üsul olduğunu bilirdinizmi?

“Acupressure” təxminən 5000 il əvvəl Çində tətbiq olunmağa başlayan ənənəvi tibb üsuludur. Bu texnika bədənin müəyyən nöqtələrinə təzyiq tətbiq etməyə əsaslanır. İnsan bədənini bir-birinə bağlı olan sinirlər dəstəsi kimi düşünə bilərsiniz. Sözügedən neyron şəbəkənin bəzi hissələrinə təzyiq göstərmək, yaşadığınız ağrı və problemi aradan qaldırmağa kömək edə bilər. Bəs, insan orqanizmində ağrı kəsici nöqtələr hansılardır?
 
Barmaqlarınızın arası...
 
Başımız ağrıyanda çoxumuz ya gicgah nahiyəmizi ovuşdururuq, ya da ağrıkəsici qəbul edib onun keçməsini gözləyirik. Əllərimizin baş barmağı ilə şəhadət barmağı arasında olan yumşaq nahiyənin ortasını 1 dəqiqə masaj etmək sizin baş ağrınızın keçməsinə kömək edəcək. Bu üsul stresdən yaranan ağrılar üçün daha effektiv hesab olunur. Bu masajı 5 dəqiqəlik fasilələrlə təkrarlaya bilərsiniz.
Ovuc içi...
Adətən xəstələnən insanların yanında əllərini və biləklərini ovuşduran birini görmüsünüz. Bu bilik qədim zamanlardan məlumdur və tətbiq edilir. Xüsusilə qadınlarda daha həssas olan ovuc nahiyəsinə edilən masajların rahatlaşdırıcı və sakitləşdirici təsir göstərdiyi iddia edilir. Ola bilsin ki, ovcunuzla ağrıyan hissəyə toxunduqda belə ağrınızın bir qədər azaldığını görmüsünüz. Bu, bütün sinirlərin əlinizin içində kəsişdiyi ilə bağlıdır.
 
Yuxu nöqtəsi...
Yuxusuzluq zamanı masaj edərək bu problemdən xilas ola biləcəyiniz bir nahiyəmiz var? Ayaq altınızın orta nahiyəsinə 30 saniyə zərif masaj etdikdə bədəninizin rahatladığını görəcəksiniz. Bu masajı sizin üçün başqası edirsə belə, qısa müddətdən sonra gözlərinizin bağlanmasının qarşısını ala bilməyəcəksiniz.
 
İstilik nöqtəsi...
Biz üşüdüyümüz zaman istəmədən əllərimizi yumruq vəziyyətinə gətiririk. Buna əsas səbəb əslində barmaqlarımızın uclarını sıxmaq istəyidir. Nəticədə, stimullaşdırılan sinirlər bədən istiliyimizin artmasına və qan dövranının sürətlənməsinə səbəb olur. 5 dəqiqə ərzində təkrar-təkrar əllərinizi yumruq halına gətirin, sonra isə boş buraxın. Bu halda siz, həm rahat olduğunuzu, həm də stresli vəziyyətlərə daha da hazır olduğunuzu görəcəksiniz.
Perikard nöqtəsi...
Perikard nöqtəsi biləyin içindən üç barmaq aşağıda və iki vətər arasında yerləşən ağrı kəsici nöqtədir. Xüsusilə baş ağrıları və ürəkbulanma zamanı perikard nöqtəsinə təzyiq etmək məsləhət görülür. Sözügedən üsul karpal tunel sindromu xəstəliyində də istifadə edilə bilər. Bu tip probleminiz olduqda, barmaqlarınızın ucları ilə perikard nöqtəsinə təxminən 5 saniyə təzyiq edə bilərsiniz.
 
Durğun dəniz nöqtəsi...
 
Döş sümüyünün ortasındakı ağrı nöqtəsi sakitlik dənizi adlanır. Artıq bilirsiniz ki, sinir sistemindəki bir çox pozğunluqlar emosional əsaslı problemlərdən qaynaqlanır. Belə vəziyyətlərdə yaranan narahatlıq və stress kimi faktorları azaltmaq üçün bu nahiyəni yüngül təzyiqlə masaj edə bilərsiniz. Ağrı nöqtəsini müəyyən etmək üçün sadəcə olaraq əlinizi döş sümüyünüzün sonuna qədər, dörd barmağınızı isə yuxarı qaldırın. Qabırğa qəfəsinizin ortasına çatdığınız zaman həmin nöqtəni müəyyən etmiş olacaqsız.
 
“Tai Chong” nöqtəsi...
 
“Tai chong” nöqtəsi baş barmağın və şəhadət barmağının qovuşduğu yerdə yerləşir. Göz problemləri, yorğunluq, stress və baş ağrıları zamanı bədəni rahatlaşdırmaq üçün istifadə olunur. Gözləriniz yorulduqda, başınız ağrıyanda, narahatlıq və ya stress hiss etdikdə də bu nöqtəyə yumşaq təzyiq tətbiq edə bilərsiniz. “Tai chong” nöqtəsini davamlı olaraq 2 dəqiqə basıb bu məşqi gündə 3 dəfə təkrarlaya bilərsiniz.
Küləyin evi nöqtəsi...
Bu nahiyə kəllə sümüyünün altındakı içi boş sahənin ortasında və ənsədən yuxarıda yerləşir. Baş ağrısı, boğaz ağrısı və ya yanma, burun qanaması kimi problemlərlə qarşılaşdığınız zaman bu nöqtəni tapıb yüngül təzyiq tətbiq edə bilərsiniz. Ağrı nöqtəsini barmaqlarınızın ucları ilə təxminən iki dəqiqə basın və bir müddət saxlayın. 
 
 
Nəzrin Beydiyeva, Ednews.net

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...