Artıq 2022-ci ilin son həftəsindəyik. 2 gündən sonra boz siçan ili yerini dovşan ilinə təhvil verəcək.
Bu il ölkəmizin ictimai-siyasi həyatında olduğu kimi, tanınmışların həyatında da dərin izlər buraxıb.
Bəs, görəsən 2022-ci il məşhurların yaddaşında necə qalıb?
Ednews cavabları təqdim edir:
Milli Məclisin deputatı Fazil Mustafa:
“2022-ci il Laçının Azərbaycan yurisdiksiyasına keçməsi və Azərbaycanın hərbi qüvvələrinin orada yerləşməsi ilə yadda qaldı. İkinci olaraq Xankəndi yolunda böyük aksiyanın qeyri hökumət təşkilatları tərəfindən ekologiya ilə bağlı keçirilməsi idi. Bu bizim üçün tarixi hadisədir. Azərbaycanın beynəlxalq arenada Qarabağ məsələsi ilə apardığı uğurlu siyasət 2022-ci ildə mövqelərimizi xeyli gücləndirdi. Qeyd edim ki, Qərbi Azərbaycan strategiyasının hazırlanması, Ağalıya vətəndaşların köçürülməsi prosesinin birinci mərhələsinin başa çatması çox sevindirici hal idi. Digər tərəfdən Şuşada “ Xarıbülbül “ festivalının keçirilməsi çox ciddi bir dəyişim idi. “Güney Azərbaycan“ probleminin gündəmə gətirilməsi isə ilin ən vacib hadisələrdən oldu”.
Deputat Aqil Abbas:
“ Bu il çox hadisələrlə yadda qalıb. Ağdamın azad olunmasının iki illik münasibəti ilə Ağdamda 500 nəfərin iştirakı ilə təbdir keçirilməsi isə mənim üçün ən əlamətdar bir xatirədir“.
Xalq artisti Firəngiz Mütəllimova:
“İstər şəxsi həyatımda, istərsədə sənət həyatımda önəmli hadisə olmadı. Pandemiya vaxtından mən özümü qorudum. Demək olar ki, seriallara, çəkilişlərə getmədim. Özümü qorumağa çalışdım. Sənətdən uzaq qalmış insan susuz qalmış balıq kimidir. Ama ən əsası odur ki, salamatçılıq olsun“.
Xalq artisti Rasim Balayev:
“ 2022-ci il qeyri adi il kimi yadımda qalmadı. Çox təəssüf ki, başqa illərdən fərqli olaraq kino sahəsində heç bir filmə çəkilmədim. Bu il mənim üçün əlamətdar hadisələrdən biri Kinematoqrafçılar İttifaqının sədri seçilmək oldu. Ümumilikdə isə bu il mənim üçün o qədər də xoş il olmadı “.
Xalq şairi Baba Vəziroğlu:
“ Bu il 2020-ci il və 2021-ci ildəki Zəfər tarixi kimi yadımda qaldı. Mən nə qədər ömür yaşasam da 8 Noyabr 2020-ci il kimi tarixi, talehyüklü bir ömür olmayacaq. Mən bundan böyük bir il gözləmirəm. Zəfər Günəşi mənim həyatımda elə bir işıq saçdı ki, hələ də yüz illər sonra da hiss edəcəyəm. Təbii ki, böyük qələbəmizin uğrunda canını fəda etmiş, sağlamlığını itirmiş, öz vəzifəsini layiqincə yerinə yetirmiş hər bir soydaşımız ehtirama, sevgiyə layiqdir. Belə hesab edirəm ki, mənim həyatımda ən unudulmaz illər həmin il olacaq. Qalan hərşey onun kölgəsində qalacaq “.
Xalq artisti Nurəddin Mehdixanlı:
“2022-ci il Azərbaycan Respublikasının Prezidenti İlham Əliyev 40 milyonluq Güney Azərbaycanlılar haqqında dövlətin, millətin adından bəyanat verdi. 40 milyonluq Azərbaycan xalqının haqq və hüquqlarının qoruyacağını bütün dünyaya elan etdi. Qeyd edim ki, Laçın yolunda Azərbaycan gənclərinin göstərdiyi cəsarət və mərdlik bütün dünyanı heyran qoydu “.
Xalq artisti Mənsum İbrahimov:
“2022- ci il mənim üçün uğurlu il oldu. 12 ölkəyə səfər etdim. Eyni zamanda Şuşa, Ağdam, Qarabağımıza səfərlərimiz olub. Əsas qürurverici hal budur ki, Qarabağımızda sərbəst, rahat tədbirlər keçiririk. Bu illəri Heydər Əliyev Fondunun təşkilatçılığı ilə VIII Muğam televiziya müsabiqəmiz oldu. Yeni ifaçıları tamaşaçılara təqdim etdik. Önəmlisi isə müsabiqənin finalı Şuşada, Cıdır düzündə keçirildi “.
Əməkdar artist Nüşabə Ələsgərli:
“ 2022- ci il sakit il olub. İtkilərim də olsa ümumilikdə mənim üçün yaxşı, huzurlu il olub”.
Modelyer, dizayner Gülnarə Xəlilova:
“ Bu il mənim üçün səfərlər ilə dolu bir il oldu “.
Müğənni Mətanət Əsədova:
“ Bu ilin sonuna yaxın lap yaxşı oldu. Mənə ən böyük yaxşılığı Niyam Salami edib. Onun yaxşılığını heç vaxt unuda bilmərəm.
Aynurə Mustafayeva
