Bu ilki elmi araşdırmalar əvvəllər tam dərk olunmayan hadisələrə işıq salıb.
Ednews republic nəşrinə istinadən xəbər verir ki, ABŞ-ın aparıcı media qurumlarından biri olan CNN tədqiqatçıların bu ilin sirrini açdığı 6 hadisədən yazıb.
Matriarxal Cəmiyyətlərin Mövcudluğu
İndependent Turkish-nin məlumatına görə, alimlərin iyul ayında dərc etdikləri araşdırmada qədim Avropada mümkün matriarxal cəmiyyətlə bağlı tapıntılar aşkar edilib. 2008-ci ildə İspaniyanın cənub-qərbində tapılan mis dövrünə aid bəzəkli qəbiristanlığın əvvəllər güman edildiyi kimi gənc kişi hökmdarına deyil, qadına məxsus olduğu ortaya çıxdı. Sevilya və Vyana universitetlərinin tədqiqatçıları tərəfindən aparılan araşdırma, qadınların eramızdan əvvəl 2900-2650-ci illər arasında Avropanın Mis dövrü cəmiyyətində liderlik vəzifələrində olduğunu göstərdi.
Qədim Roma Mərmərlərinin Davamlılığının Sirri
Qədim Romada istifadə edilən mərmərlərə davamlılıq verən materialın “əhəng parçaları” adlanan ağ maddələr olduğu anlaşılırdı. Araşdırmaçıların yanvar ayında nəticələrini paylaşdıqları araşdırmada İtaliyanın Lazio bölgəsindəki Privermo kommunasında Roma İmperiyasına aid 2 min illik mərmər qalıqları araşdırılıb. Sözügedən parçaların mərmərdəki çatların zamanla öz-özünə bağlanmasını təmin etdiyi ortaya çıxdı.
Buz Adamı Ötzinin Əsl Görünüşü
1991-ci ildə Avstriya-İtaliya sərhədindəki Ötztal Alp buzlaqlarında tapılan buz adamı Ötzinin görünüşü ilə bağlı məlumatlar avqust ayında dərc edilən araşdırma ilə dəyişdi. Elm adamları Ötzi saçlı və saqqallı, solğun dərili bir insan kimi təsvir edərkən, son araşdırmada DNT analizi buz adamının əslində qara dərili və keçəl biri olduğunu göstərdi.
20 Min İllik Boyunbağının Sahibi Ortaya Çıxdı
Tədqiqatçılar Sibirdə paleolit dövrünə aid boyunbağı fraqmentində insan DNT-sini aşkar ediblər.
Bu araşdırmada alimlər ilk dəfə tarixdən əvvəlki obyektdən DNT əldə etmək üçün yeni üsuldan istifadə ediblər. May ayında nəşr olunan araşdırmada, Altay dağlarında Denisova mağarasında tapılan asqının boyunbağı kimi istifadə edilmək üçün içinə deşik açılmış, təxminən 2 santimetr uzunluğunda bir maral dişi olduğu anlaşıldı.
Qədim Perqamentin Sirri
Təxminən 2 min il əvvəl Vezuvi dağının püskürməsi ilə qədim Roma şəhəri Herkulaneumda 1000-dən çox qiymətli tumar külə çevrildi.Bununla belə, ABŞ-ın Nebraska Universitetinin kompüter elmləri tələbəsi Luke Farritor süni intellektin köməyi ilə tumar qalıqları üzərində bir söz oxumağı bacarıb. Kentukki Universitetinin təşəbbüsü ilə keçirilən müsabiqəyə qatılan Farritor perqament qalıqları üzərində yunanca “porphyras”, “bənövşəyi” sözünü deşifrə edərək 40 min dollar qazanıb.
Mumiya Resepti
Alimlər qədim misirlilərin ölüləri mumiyalamaq üçün hansı maddələr və qarışıqlardan istifadə etdiklərini müəyyən ediblər. Misirin tarixi Sakka bölgəsindəki mumiyalama emalatxanalarında tapılan qalıqları araşdıran tədqiqatçılar mumiyalama proseslərində ardıc, sərv və sidr kimi bitki yağlarından, həmçinin püstə ağaclarından əldə edilən qatranlardan, heyvan yağlarından və mumlardan istifadə edildiyini müəyyən ediblər. Alimlərin fikrincə, bu materiallarla hazırlanan qarışıqlar meyitləri yağlamaq və pis qoxuları azaltmaqla yanaşı, yoluxma və parçalanma riskinin qarşısını almaq üçün hazırlanıb.
Xəyal Ramiz