Dünyanın bir çox ölkələrində insanlar fərqli həyat tərzlərinə malikdirlər. Bəzi ölkələrdəki insanlar çox işləməyə, bəziləri idmana və sağlamlıqlarına, bəziləri isə əyləncəyə, zövq aldığı şeyləri etməyə və. s önəm verirlər. Ən maraqlı, fərqli yaşam tərzinə sahib olan ölkələrdən birisi də İspaniyadır.
Ednews-un xəbərinə görə, İspanyanın ümumi əhalisi təxminən qırx yeddi milyondur. Əhalinin böyük bir hissəsi şəhər sakinlərindən ibarətdir. İspanlar üçün işləmək qədər, istirahət etmək, əylənmək də bir o qədər vacibdir. Burada insanlar yeməkdən, gəzməkdən, ünsiyyət qurmaqdan, gecə həyatından, hətta yuxudan da zövq almağa çalışırlar. Xüsusilə də yuxu ispanlar üçün çox vacibdir, belə ki, daha çox ispanlara məxsus olan və "siesta" adlanan günorta yuxusu anlayışı hal-hazırda daha çox yayılmamış və vacib olmasa da, yenə də bir çox ispanlar gündüzlər ortalama 1 saat yatmağa üstünlük verirlər.
Bununla yanaşı pivə, qırmızı və ağ şərab, tekila kimi spirtli içkilər də ispanların günlük yaşamlarının əsas parçalarından birisidir. Xüsusilə də, ispanların axşam yeməklərini 1-2 qədəh şərab müşayiət edir. İspaniyanın cənubunda Əndəlüs muxtar icmasının tərkibinə daxil olan, Kadis əyalətində yerləşən kiçik Sanlucar-de-Barrameda şəhəri 2022-ci ildə İspaniyanın qastronomiya paytaxtı elan edilib. Bu isə dəniz məhsulların üstünlük təşkil etdiyi İspaniya mətbəxinin zənginliyindən xəbər verir.
İspanyada əyləncə anlayışını daha çox gecə həyatı və futbol əhatə edir. Nəinki kişilər, hətta qadınların belə böyük əksəriyyəti futbolu sevir və futbol oyunlarını canlı izləməyə böyük bir coşqunluq ilə gedirlər. Bu ölkədə mağazalar 10:00-20:00 saatları daxilində açıq olur və 14:00-dan 17:00-a qədər fasilə saatıdır, lakin mağazaların 10:00-da açılmasına baxmayaraq barlar və çörək mağazaları 08:00-dan etibarən açıqdır. Bunu da qeyd etmək lazımdır ki, digər bir sıra Avropa ölkələri kimi İspaniyada da bazar günləri mağazalar fəaliyyət göstərmir.
Ümumən, ispan xalqı bu gündən zövq almağa çalışır və sabahı düşünmürlər, onlar həyatı yemək və yuxusuz təsəvvür edə bilmirlər, öz emosiyalarını heç vaxt gizlətmirlər, bir cümlə ilə izah etməyə çalışsaq, özlərinin də milli şüarlarında dedikləri kimi “Həyat əziyyət çəkmək üçün yox, zövq almaq üçündür”. 12 oktyabr bu həyat dolu ispan xalqının milli bayramıdır və bu gün “ispan millətinin günü” adlanır.
Həyatı istər ispanlar kimi zövq alaraq, istər almanlar kimi elmə və inkişafa üstünlük verərək, istərsə də ingilislər kimi öz mədəniyyətlərinə bağlı şəkildə yaşayaq, lakin sonunda peşman olmayacağımızdan əmin bir şəkildə yaşamaq ən doğrusudur.
İspan xalqının həyat tərzi ilə bağlı mövcud araşdırmalara, məlumatlara nəzər yetirdikdə belə nəticəyə gəlmək mümkündür ki, ispanlar həyatlarını öz zövqlərinə və istəklərinə uyğun yaşayır, stress, mənfi düşüncələrdən uzaq qalmağa çalışırlar.
