Çinin Daxili Monqolustan bölgəsində yerləşən toryum yatağı ölkənin enerji ehtiyacını demək olar ki, sonsuza qədər qarşılayacaq potensiala malikdir. Üstəlik, bu yeni enerji mənbəyi qlobal enerji balansını da tamamilə dəyişdirə bilər.

“EDnews” xəbər verir ki, Pekindəki geoloqlar Çinin enerji tələbatını 60 min il ərzində təmin edə biləcək qədər böyük enerji ehtiyatı tapdıqlarını iddia ediblər. Bu isə praktik olaraq sonsuz enerji anlamına gəlir.

Məlumata görə, Çinin şimalında yerləşən muxtar bölgə olan Daxili Monqolustandakı "Bayan Obo" mədən kompleksində ölkənin daxili enerji ehtiyacını uzun müddət qarşılayacaq həcmdə toryum aşkarlanıb. Yüngül radioaktiv olan bu element, ərimiş duz reaktoru adlanan və nəhəng həcmdə enerji hasil edə bilən növ nüvə elektrik stansiyalarında istifadə oluna bilər.

Alimlər mədən kompleksinin tam gücü ilə işlədiyi halda buradan 1 milyon ton toryum əldə edilə biləcəyini hesablayıblar.

Araşdırmada qeyd olunur ki, ölkənin mədən tullantılarındakı toryum ehtiyatları tamamilə toxunulmaz vəziyyətdə qalır və düzgün şəkildə hasil edildiyi təqdirdə dünyada fosil yanacaqlardan asılılığı sona çatdıracaq miqyasda ehtiyat mövcuddur.

Bu xəbər Türkiyədə baş verən və toryum araşdırmaları ilə bağlı olan təyyarə qəzasını da yada salıb. Qeyd edək ki, toryum mövzusunda Türkiyədə də mühüm araşdırmalar aparılırdı. Lakin araşdırmalara rəhbərlik edən professor Engin Arık və onun komandası 2007-ci ildə baş verən təyyarə qəzasında həyatını itirmişdi. Hazırda həmin qəzanın "sonsuz enerji" tapıntısının qarşısını almaq məqsədilə təşkil edilmiş sui-qəsd olduğuna dair ciddi müzakirələr aparılır.