Günəşdə yüksək dərəcəli güclü alışmalar qeydə alınıb.
EDnews xəbər verir ki, bu barədə Rusiya Tətbiqi Geofizika İnstitutunun Heliogeofizika Xidməti məlumat yayıb.
Məlumata görə, martın 30-da Moskva vaxtı ilə saat 00:38-də (Bakı vaxtı ilə 01:38) rentgen diapazonunda 33 dəqiqə davam edən M1.4 (S14E82) sinifli alışma qeydə alınıb.
Bundan əlavə, mütəxəssislər M1.4, M1.5, M1.6 və M1.9 siniflərinə aid daha dörd alışmanın baş verdiyini bildiriblər.
Qeyd edək ki, Günəş alışmaları rentgen şüalarının gücünə əsasən A, B, C, M və X siniflərinə bölünür. Ən zəif A0.0 səviyyəsi, Yer orbitində hər kvadrat metrə 10 nanovat radiasiya gücünə uyğun gəlir. Hər sinif irəlilədikcə enerji 10 dəfə artır.
Günəşdə baş verən bu partlayışlar, adətən, plazma emissiyaları ilə müşayiət olunur. Emissiya buludları Yerə çatdıqda isə maqnit fırtınalarına səbəb ola bilər.
Şəms Qasımlı // EDnews
