Uelsdə yerləşən "Space Forge" startapı ABŞ-ın hərbi qurumlarının dəstəyi ilə təxminən 30 milyon dollar sərmayə toplayıb. Şirkətin əsas məqsədi yarımkeçirici çiplərin hazırlanmasında istifadə olunan materialları kosmosda, çəkisizlik şəraitində istehsal etməkdir.

EDnews xəbər verir ki, süni intellekt və elektromobil texnologiyalarının sürətli inkişafı yüksək keyfiyyətli yarımkeçiricilərə tələbatı artırıb. Ancaq əsas material olan silisium artıq Yer üzündə mövcud texnoloji imkanlarla maksimum həddə çatıb.

"Space Forge" hesab edir ki, bu texnoloji tıxanıqlığı yalnız Yer atmosferindən kənarda, kosmosun unikal fiziki şəraitində – çəkisizlik mühitində aradan qaldırmaq mümkündür. Startapın fikrincə, kosmosda istehsal olunan kristallar daha az defektə malik olur və bu, onların enerji səmərəliliyini artıraraq kvant hesablama, müdafiə sənayesi və digər qabaqcıl texnologiyalar üçün ideal şərait yaradır.

Hazırda kosmosda real yarımkeçirici çip istehsalının nə zaman başlayacağı ilə bağlı rəsmi məlumat yoxdur, lakin bu layihə yüksək texnoloji inkişaf üçün perspektivli addım sayılır.

Fatimə Şükürova // EDnews